大師兄我除咗認真睇拳好少理其他野，娛樂圈更加少理，所以比人問起點睇Rika比人「打出娛樂圈」我真係R晒頭。聽完朋友講件事之後發現加下嘅討論都係圍繞住「留手」呢個問題，不如同大家講下我點睇。

簡單講講件事，就係劉燕妮（Rika）同黎美言 （Winkie）打，比人打到塊面花晒。同時有傳Winkie同其他人練習果時已經唔係好留力。之後Winkie打完仲同Rika講自己留咗手，Rika覺得佢好唔尊重。Rika嘅好姊妹唐紫睿（Hazel）就好嬲，幫埋手話Winkie。Rika幾日前係facebook千字文話Winkie同時宣佈退出娛樂圈。大概係咁，有錯同我講翻聲。

輿論方面，有人話Rika同Hazel搏新聞；有人話Winkie磅數比Rika重成10磅應該留手；有人覺得Winkie真係已經留咗手，有人覺得無；亦有人話Winkie講「我留咗手」好唔尊重。

留手定唔留手？

撇開之上嘅討論，單講留手，我唔覺有人留手，同時選手亦唔應該留手。體重有差別唔公平，係賽制同公司問題，唔係選手問題，選手無責任留手，亦唔應該祈望對方重過自己就會留手。相反，訓練嘅時候唔出全力係一定嘅，傷咗自己傷咗人點打比賽？

自己留手同祈望對方留手有兩個問題，第一係安全問題，第二係唔尊重。

第一，外國打比賽前拳證一定會講「Protect yourself at all time」，如果拳手無好好保護自己，拳證係可以即時判佢輸嘅。保護自己係選手首要責任，唔好諗會有人留手保護你。

第二，每個拳手都應該全力作戰，咁先對得住教練、支持者、睇嘅人、對手、仲有最重要嘅，自己。打拳除咗面對對手，就係面對自己，你留手，即係唔尊重認真訓練嘅你。

另外，打完之後同人講自己留咗手真係好唔尊重，咩人講都係，好過份。真正嘅朋友同真正嘅尊重應該好似Lyoto Machida同Mark Muñoz咁。佢地本身係朋友仲係訓練拍檔，但係UFC要佢地比賽，佢地就約定贏咗嘅人要請輸咗嘅人食晚飯。結果場比賽Lyoto Machida係KO咗Mark Muñoz，但都有照約定完場後一齊去食晚飯。

Hazel喺自己facebook講:

「突然好想問有看G1比賽的觀眾，一條問題⋯⋯假如你有壓倒對手嘅能力，你會選擇？

1.落鎖，取點數取勝 2.出盡全力，top mount打到佢豬頭為止」

首先，落鎖就打降服，成功會完場，唔會有點數出現。第二，我認為兩個方法都無問題。

會出現以上講法係因為班女仔唔太清楚自己會面對咩，就貿貿然參加比賽，可能係佢地睇少咗件事（覺得真人Show係Show所以唔洗噤肉緊？），可能係公司無講清楚，呢個我唔知，點都好，雙方都有責任。

所以？

Winkie比賽打人無問題，大大力打都無問題，但係打完之後講「我留咗手」就真係好唔尊重，邊個講都係，唔單止Winkie。打拳係打人㗎啦，行得正企得正，做咩要話自己留咗手？講咗客氣好多咩？就好似搶咗人女朋友，仲同返個苦主講「唔好意思呀，我都唔想㗎」，攞景咩？同時，我唔覺得佢有留手，但如果佢真係有留手，我會覺得更加唔尊重對手，同時亦唔尊重自己。

Rika退唔退出娛樂圈真係佢自己先可以決定，但係就算退，都希望佢可以繼續學拳。你以為我覺得佢打拳技術唔好？佢輸係佢技術差？你錯晒，我可以講，佢可能係呢班女仔入面最好技術果個！佢打立技有form，打鄧穎芝（Vangie）（Van仔）同鄧洢玲（Elaine）（阿旦）果時亦好有sence 、進退得宜，打Vangie落地會打Double Ankle Grab Sweep同做咗個靚armbar，唔好忘記，Rika喺成班女仔入面最輕磅果個！唔打拳真係好可惜！唔好噤快就放棄呀！大師兄支持你！

（Btw，大師兄老啦，佢地好多個名呀，我記唔晒㗎，搞到成日唔知邊個打邊個，用開佢果個名就果個名得唔得呀？媽我好亂呀！）

（本文純屬作者意見。）