大婚前50天， K小姐為咗著得落名牌婚紗，求助營養軍師Susan，對方叫佢首先寫低過去一星期食過乜，先從K小姐飲食習慣入手。喺倒數48天，K小姐交出餐單，先發現，原來自己同天下間所有繁忙的OL一樣，食嘢的pattern，就係冇pattern……

=大婚前50天，見面篇在此=

【作戰者K】

我無諗過，要記齊過去7日每餐食過啲乜有咁難。我喺公司負責管理一個幾人小組，瓣數多，一腳踢，組員一人一句，搞到我頭都暈，連記著佢哋問乜、我要答乜都唔記得，邊得咁好閒情逸志，細心寫低自己每餐食過乜？

何況我食無定時。都冇定時食飯的習慣，卻要有定時記低食咩的習慣，真係難上加難。

於是，當Susan 喺前日 lunch 時，問我記餐單記成點，我先赫然發現冇寫低過任何一餐。

今次大件事了。如果直接話冇功課交，實在太醜了。

於是，我逼自己坐低喺工作枱，開始搜盡枯腸，嘗試專心記起食過乜，但記極，都得6日。

算啦，交住功課先啦。又俾我發現，原來我進食真係時間亂晒籠，毫無pattern……

軍師 Susan

俗語說 You are what you eat；想修身減肥，首先要睇下K小姐的飲食習慣。

DAY 1

早餐10點半：200ml 朱古力鮮奶TEA下午4點：兩款饀餅晚餐7點：燒乳鴿+ 雞粥

過關。但點解沒有lunch的呢？？

DAY 2

早餐10點半：200ml 朱古力鮮奶午餐2點半：白汁鴨胸螺絲粉 + 凍豆漿無冇食晚餐

先講早餐，朱古力鮮奶含豐富蛋白質和鈣質，可是加了朱古力令熱量增加。

午餐的「白汁鴨胸螺絲粉」，白汁通常會在製造過程加入牛油和忌廉，脂肪和熱量較高，可選清湯或蕃茄汁代替。

又，點解沒有晚餐的呢？

DAY 3

早餐：咸豬仔一個午餐3點：香茅豬扒米 + 熱杏霜（冇落糖）晚餐8點：半個紙包蛋糕 + 3塊OREO餅乾宵夜10點半：蕃茄豬潤通

熱杏霜本身已經有糖，不落糖，good。

但OREO餅乾是精緻澱粉，會令血糖快速上升，容易產生飢餓感。

宵夜食蕃茄豬潤通，蕃茄含維他命C和高纖維素，good，但豬潤高膽固醇，應少食。

DAY 4

早餐於正午12點：A1肥仔麵包 + 超群蛋撻。下午4點半TEA一TEA：中大檸檬撻。晚餐6點：德國豬手半隻 + 2條腸 + 凍檸茶。宵夜11點：湯煮唐生菜 + 3粒豬肉丸 + 4粒雲吞。

早餐麵包加蛋撻可能好好味，但屬精緻澱粉，高脂又高糖，如趕時間，可在便利店買吞拿魚或燒雞三文治取代。

下午的檸檬撻又是屬於精緻澱粉，又是高脂又高糖，建議以食香蕉取代。

晚餐全部都高鹽、高脂、高糖三高，big no no。

宵夜的湯煮唐生菜、少量豬肉丸及雲吞，熱量低，有蛋白質和纖維，good。

DAY 5

早餐11點：炒蛋 + 多士 + 蜜糖雞扒一小塊 + 腸片沙通粉 + 凍奶茶。1點小食：haagen daz cookies n cream 雪糕一杯。晚餐7點半：阿媽煮家飯－半碗飯 + 三色蒸蛋 + 栗子及薯仔幾小件 + 菜心。

早餐飲奶茶是 big no no，因為又係三高：高鹽、高脂、高糖，奶茶內的淡奶屬高脂肪高熱量。應改飲無糖熱檸水

雪糕應戒。口痕可食較甜的水果，如以菠蘿、萍果、香蕉取替。

住家飯熱量低，有蛋白質和纖維，同應該比較少油。Good balance of nutrients。

DAY 6

早餐：健康麵包一個 + 即沖咖啡加奶加糖。午餐：肉絲湯麵線 + 3件炸物 + 熱冬瓜意米水。晚餐：未食，未收工，起碼9點後先食。未知食乜。

早餐飲咖啡是可以的，但走糖更理想。

午餐有炸物，高鹽高脂，big no no！但熱冬瓜意米水是飲對了，因為可以去水腫，又含纖維，對下身肥胖有幫助。

至於晚餐，若接近睡覺時間才吃晚飯，會令身體吸收過多未能消耗的能量。

從K小姐飲食習慣看來，有點令人擔心，因為她齊集了繁忙事業女性的一般飲食陋習。為了協助她達成目標，要著得落婚紗，我已想好給K小姐什麼挑戰。

Challenge ONE：戒甜一星期！

但是，請她寫齊餐單也艱難，我之前在電話中給她的這項任務，能順利完成嗎？希望她能，因為時間已經不多了。

－修身小貼士：餐單篇－

K小姐餐單的一大特點，是進食時間混亂。可能因為繁忙，工作性質又沒有特定lunch time，養成K小姐只顧忘形工作，常常忘記適時進食。這點必須改。三餐應盡量定時進食，並小食多餐，才能阻止肚餓時身體吸收過多能量。三高（高鹽高糖高脂）是big no no，淡口味取勝。糕點甜品絕大多數屬精緻澱粉質，no no。口痕時應以食生果取代。