點解夾極都唔暈？究竟係夾佢個頭定手？放隻腳係人地個頭係十字固定三角絞？要更好欣賞一樣野，就要對佢有一定嘅認識。決定係時候同大家講下技術，普及一下。

今次就講唐柴睿 （Hazel）同鄧穎芝（Vangie）打果場成日聽到嘅技術：三角絞。

任何鎖頸嘅技巧都可以分為三個類：Neck crank，Air choke同Blood choke。Neck crank目標係扭頸椎，Air choke壓對手氣管，Blood choke就壓大動脈（Neck crank嘅技巧通常比較危險，會少用）。

三角絞就係Air choke／Blood choke。呢招用自己兩隻大脾夾緊對方嘅頸同肩，然後收埋，擠壓縮細個三角型，令對方抖唔到氣或者無血上腦。

三角絞

三角絞，英文係Triangle choke，日文發音係Sankaku-jime。當你訓係地，左腳放係人地條頸邊，用小腿下壓對方嘅頸背，用右手碗......唉都係直接睇圖啦：

1. 雙腳夾喺人地個頭後面，記得中間有隻手

2. 用右腳推對方的hip令自己斜斜地

3. 右手捉住自己腳腕（或用手腕扣自己腳腕），另一隻腳再扣實

4. 雙腳形成三角型，對方隻手放自己扣頸果隻腳果一邊，比力向內擠壓

點解Hazel失敗？

（片段:http://viu.tv/encore/g-1-fight-club#g1-fight-clube10hazel-vs-vangie，42分20秒至43分00秒）

第一，佢喺Vangie起緊身果時用。人地起咗身就好難控制，一來距離唔岩，二來難發力。

第二，Hazel想控制Vangie上半身，但對方掙扎中好難扣實隻腳，Hazel有sense，知道打三角絞嘅時候身體最好唔好同對方成一直線，要鈄少少。但係，喺未鎖緊嘅時候就有角度，就有機會比人走隻手出黎，隻手一出黎，三角絞就打唔成。但如果夠快就唔係大問題。

（42分37秒至 40秒）第三，我覺得係重點，佢用錯力。打三角絞嘅時候隻腳唔係推，亦唔係夾人落黎，係收。推開個人就一定做唔成。幻想下隻腳做咗個三角之後成個人縮埋做個波，大概就係呢度力。推開咗對手自己個form就會散，腳形成嘅三角形就縮唔埋。（除非你係Ryan Hall（一位柔術家），佢就係其中一隻腳推，但佢嘅方法都係要keep個人埋身，而唔係推開佢。）

有呢個情況可能係訓練嘅問題，好似28：04果時嘅訓練片段，唔應該比佢習慣夾個對手落去。唔係話夾落去之後做唔到三角，而係難好多。不過訓練片段就一向用黎昆人，話唔定平時唔係咁呢。

應該？

首先要控制對方posture，可以用手扣住對方一隻腳，或者手。例如上圖，可以控制Vangie隻右手，除咗防止佢出拳，同時可以keep 返佢貼近少少地面。

如果同對方有一定距離，做唔到三角，可以轉三角十字固（triangle armbar）。對方隻手都直哂，拉手推hip就打得成個十字固。

三角絞同其他鎖，例如十字固相比，最大嘅分別係要自己感覺果個夾緊擠壓嘅感覺同角度。十字固成咗形，靚嘅，通常都會中，但係三角絞有時成咗形，個角度唔岩少少就唔中。每個人腳長唔同，所以每個人方法都有少少差異，最重要係多練習，搵到自己個方法。

今日係噤多，其他技術搵次講，一次講一樣易消化嘛。

【編按：相片為ViuTV《G-1格鬥會》節目擷圖。】

（本文純屬作者意見。）