佛誕係星期六，搞到好似無咗日假，有無搞錯強烈建議所有星期六放嘅公眾假期都要補返，真係丫

《G-1格鬥會》終於到尾聲。打拳同其他比賽一樣，實有輸贏。贏家就固然開心，不過有時唔係輸咗場比賽就唔代表真係輸家。大師兄襯呢個機會同大家講下成個《G-1格鬥會》嘅真正贏家與輸家。

贏家: 八個女仔

當然要恭喜唐紫睿（Hazel）贏咗冠軍，但其他女仔都係贏家。雖然賽事得一個人可以笑到最後，但係見到每個女仔都辛苦訓練上擂台，呢份認真同鬥志係抵讚嘅。

贏家/輸家:  Hazel嘅十字固同三角絞

Hazel可能因為腳長，成日都好易係防守位置（Guard）做到三角絞，之後轉去打十字固。佢個三角嘅問題上次講咗唔重覆。但係佢個十字固嘅成功率都唔見得好高。唯一成功果次係攞咗騎乘位（Mount）後做嘅十字固，基本上係Guard嘅十字固都打唔到。佢次次夾到人地隻手唔control就直接比力，結果扭咗對個身落地，變咗要用面向下嘅十字固（Belly Down Armbar）。唔係話唔得，但係難咗。其實可以轉返對手面朝上，自己做返普通十字固。睇下有十字固女王之稱嘅Ronda Rousey點做:

1. 攞左隻手唔洗急，目標係翻轉對手先打十字固

2. 因為另一隻腳太遠，先將一隻腳拉近

3. 到另一隻腳

4. 隻手畫弧形掉開隻腳

5. 自己左腳上頭幫手拉對手落地

6. 成功將對手翻倒及保持十字固姿勢

最重要係控制同位置，唔洗一黎就比力做，攞咗隻手唔洗急。地戰技術永遠係位置重要過降服，學十二萬招降服但唔識位置轉換其實無用，有位置要做降服其實好簡單。

不過，Hazel個十字固就算降服唔到郭思琳（Margiela）都整到佢痛到打唔到落去。呢件事唔係咩新鮮事。UFC 152，Vitor Belfort係第一回合打咗個靚十字固，佢嘅對手Jon Jones忍住無投降而且最後仲贏埋場比賽，不過個十字固都拉傷咗佢右手韌帶，所以並唔係無投降就唔傷。

輸家: 「想睇好少少嘅立技戰」同「唔係好識地戰技術」嘅觀眾

之前講過嘅「G-1戰鬥流程」，即係衝埋去亂拳之後落地，由第一集到最後一集都出現。其實八個女仔嘅打擊技技巧都有進步，但都係停係直拳前踢果個level，勾拳都好少見。

落到地，技術係有嘅，但係唔係好識睇嘅觀眾就一頭霧水，見到兩個人扭來扭去，都唔知做乜，亦唔知應該做乜。呢個問題會出現就係因為以下嘅大贏家。

大贏家: 講到錯晒都可以繼續做嘅旁述

一落地就淨係識話人地係Guard，講下上位下位可以點做好無？人地係Half Guard就淨係識叫人返Guard，講下Half Guard Sweep好無？講下點防守好無？

算，我當你覺得太多資料，觀眾接收唔晒，但你講岩d野得唔得呀？「有一隻手仲喺防守範圍到」係咩意思？三角絞係要有隻手喺入面㗎啦！定係你講邊隻手阻住咗呀？但係無手阻住喎師兄！

「如果Hazel隻左腳可以橫跨喺條頸到就做到」，佢隻腳橫跨都唔係關鍵，佢打唔到係因為佢用錯力丫嘛！而且，佢咪橫跨咗囉！見唔見到呀？

Margiela同黎美言果場，「呢一個斷頭台嘅姿勢」，呢個邊忽似斷頭台呀？呢招叫Standing Side Headlock，如果想講Standing Guillotine（站立式斷頭台），黎美言個身要係另一面！

算，人誰無過，我當你睇錯講錯，你都講下d觀眾睇唔到嘅野丫？喂Hazel隻右腳有butterfly hook呀，可以打掃技㗎，做咩唔講呀？

見唔見到有隻手勾咗頸呀？另一隻手connect到係斷頭台黎㗎，你仲話無太大變動！

請你返黎就係講d人地唔識嘅野丫嘛。而且台下噤多師傅，搵個做下技術旁述得唔得？好貴咩？

贏家/輸家:  香港MMA

講真，十幾年前同人講MMA，人地以為係Money Manager Account；同人講柔術，人地就當游水；結果人地問你學咩，為求方便都係答泰拳空手道，廢事浪費口水解釋。加下唔洗啦，全香港都識咩係MMA，咩係地戰，咩係柔術，喺呢方面，真係普及咗好多，起碼大家有個知字。

但另一方面，好多無睇開嘅觀眾會覺得MMA無咩技術，誤會咗MMA就係「兩個人亂打打打，埋身扭下跌低咗繼續打打打，兩個人碌下地沙，打打打，完場」。其實，MMA發展到而家，不論立技定寢技，都已經好細緻好精密，絕唔係亂打可以贏。G-1嘅女仔唔係專業拳手，同國際水平相差甚遠，就好似一班岩岩學寫毛筆字嘅小朋友，無理由要求佢地寫到國手咁，亦無理由睇完班小朋友手字就覺得毛筆字就係呢個樣。

下次同大家睇下其他比賽，今日係噤多！

（本文純屬作者意見。）