話噤快又四年，又係奧運一連幾個星期同大家講吓奧運入面有關武術嘅項目話說今年奧運拳擊有幾個翻天覆地嘅變化，今次先同大家講其中一個

唔知係咪大師兄自己錯覺，今年奧運氣氛好似唔太熱烈。之前都會有電視台之類谷吓，今年除咗搵咗唔關事嘅荷蘭叻去舉火炬之外，好似都無咩討論。可能最近世界都太多唔開心嘅事，爭執又多，所以無噤著緊奧運。但正正奧運就係比唔同國家放下成見一齊公平比賽，宣揚和平同平等嘅場合，喺呢種時候就更值得大家支持吓。

今年奧運拳擊有兩個好大的變更，第一個就係男子組果邊取消戴頭套，詳情可以睇下面相關文章。簡單嚟講就係除咗好睇D，仲減少拳手腦震盪的嘅機會。AIBA個研究其實已經係2013年嘅事。佢收集咗15000個回合嘅資料，當中嘅7352個回合入面有戴頭套，7545個回合就無戴。研究發現有戴嘅回合入面，rate of concussion （震動率）為0.38，相反無戴嘅就只有0.17，即係頭套嘅墊造成更多震動。

同時研究指拳手戴頭套後會有錯誤嘅安全感，呢種錯誤安全感係其他運動都有發生。有說美式足球員戴咗頭盔之後全力撞所以令傷害更大。研究亦同時指戴頭套後亦更難睇到對手嘅拳，變相更難防守。加埋就代表拳手戴頭套後中更多嘅拳，所以增加腦震盪的嘅機會。

可能大家都係好難接受「點解唔戴會更少機會腦震盪？」，我唔係呢方面專家，評論唔到佢嘅真確性，不過打拳時護具嘅作用同我地直觀相違背呢種事其實時常發生。

好似MMA入面個拳套，其實並唔係用嚟保護被擊打果一方，而係保護打人果個人隻手。果個薄薄嘅拳套真係減唔到好多對他人嘅傷害，反而保護咗出拳者嘅手指骨同手腕。如果你試過唔戴拳套打沙包就明我講咩，只要拳嘅角度一唔岩手指或者手腕就會傷，而人頭骨仲硬過沙包，可想而知唔用拳套打人有幾傷手。當然咁證明唔到唔戴頭套好過戴，但只係指出有時直覺同真實情況可能會有出入。

不過有樣嘢我唔係好明，如果唔戴頭套係想保護拳手，點解只係要男選手唔戴而女選手要繼續戴呢？唔通女仔唔洗保護？佢地話女子拳擊數據未夠，而且想一步一步嚟。果然係有科學精神，數據唔岩用就唔做住，咁我想問點解一開始就唔抽埋女子組數據？講到尾咪又係因為男子比賽多人睇所以搞先。

下次再同大家講吓其他改動！

（本文純屬作者意見。）