有香港運動員衝出國際為港增光，但係居然唔多人講大師兄一向支持香港運動，點都要講句，同時想為摔角平反下

首先想讚所有香港運動員，同埋有心推廣自己熱愛果樣運動嘅人。係香港玩運動唔難，但用嚟搵食就超難。唔好話推廣咁遠，如果你玩果樣運動比較冷門，根本上無任何援助。香港政府次次都要靠一兩個勁人，喺無援助嘅情況之下，單靠個人天份同毅力，喺國際比賽做出好成績，之後政府先會幫下手（甚或無咩幫）。你估樣樣運動都搵到商業資助咩？你話有盛事基金？咪玩啦，你試下按入去體育盛事，入面嘅活動都有大商家贊助㗎！

所以，兩位香港摔角手李杰森(Jason Lee)同何顥麟 (Ho Ho Lun) 可以衝出香港去WWE (World Wrestling Entertainment) 參加世界輕量級經典賽 (Cruiserweight Classic)，認真勁。WWE喺摔角界，就好似籃球嘅NBA，MMA嘅UFC一樣，可以話係該運動最頂尖嘅比賽團體。佢地場比賽已經錄咗，7月中就有得睇。

讀者可能唔太清楚摔角同摔跤嘅分別。最簡單來說，摔跤係奧運見到的嗰種比賽，重競技；The Rock，成日畀人惡搞嘅 John Cena 嗰隻摔到飛天、打極唔輸嘅係摔角，重表演。七十年代果時摔角好多人睇，但加下熱潮減退，摔角變成較小眾嘅運動，摔角團體都係得「港摔」一個，摔角手亦唔多。兩位摔角手可以係無政府和商業資助下都可以摔出香港，好抵讚。

講起摔角，其實我都好少睇，但聽到有人話「超！假㗎！有咩好睇呀」？就覺得好不爽。係呢到想幫摔角平反下：

第一，人各有好，有人鍾意睇足球、有人鍾意睇籃球、有人鍾意睇人打機，你自己唔鍾意就唔代表無嘢好睇嘅。學識欣賞下人地嘅嗜好，做人眼界闊D啦。

第二，關於假，好多摔角手都話無劇本無對白，唔係行內人唔知幾成真幾成假。但招呢就一定有夾嘅，唔係做唔到果種「反轉再反轉」嘅效果。不過，咁樣就假㗎啦咩？

欣賞摔角嘅其中一個方式，就好似睇舞台劇同魔術。睇《羅密歐與茱麗葉》，羅密歐同茱麗葉二人自盡死去，到最後完場謝幕果時兩位演員出嚟鞠躬，你會唔會話「你做咩呀你死咗㗎喎，搞錯呀！回水！」？睇魔術果時魔術師飛起咗，你會唔會以為佢真係識飛？咪又係掩眼法。

佢果個後橋背摔真係喺你面前做咗出嚟，個雪崩式夾頭翻摔亦真係夾頭飛落去，雖然就咗位，但有幾假呀？你睇戲有得吊威也、有得就鏡頭、有得CGI就唔假，人地係台做出嚟就假？

仲有，班摔角手真係有練招練身材。有幾個人出到去打MMA成績都好唔錯，好似Brock Lesnar就攞過UFC重量級冠軍（佢有摔跤底） ，Bobby Lashley都喺MMA打得好唔錯。最近UFC宣佈咗Brock Lesnar會係UFC 200 對陣Mark Hunt，到時大家可以睇下佢打成點。

今日係咁先！

（本文純屬作者意見。）