上次講過奧運拳擊有幾個大改，繼續講返。今次奧運職業拳手都可以去打，咁業餘拳手咪唔洗玩？如果件事咁簡單，大師兄就唔洗講啦。

(From Getty)

其實件事唔難理解，但係要講清楚就要提一大堆好鬼煩嘅背景。為免悶親大家我會好精簡地講講個背景。

職業同業餘兩個世界

拳擊分開職業同業餘，兩個係唔同世界。職業果邊有「四大」及一堆細嘅拳擊組織，四大包括WBC、WBA、WBO同IBF，細嘅單單美國都有近70間，分開噤多個組織其實都係因為錢錢錢，唔多講。另一邊業餘，其實就即係奧運果種，間嘢叫AIBA。

本來大家都係你有你搞、我有我搞。但係6月頭AIBA開咗個會，決定取消對職業拳手參加奧運會同世錦賽嘅限制。想打嘅職業拳手只要向國家報名，國家又比，就可以參加7月頭一個喺委內瑞拉搞嘅資格賽，通過預選就可以打奧運。

本來河水井水，點解AIBA又想叫埋職業拳手嚟玩奧運呢？我諗因為兩個原因。第一係因為AIBA一向都無咩人理，想借此提升下影響力；第二係因為拳擊係呢個決定之前，係唯一完全唔比職業選手參加嘅奧運項目，當其他運動都比職業選手玩嘅時候，「跟隊要貼」呢個道理大家都明。

講下兩種比賽有咩分別先。以前職業規則同奧運果套規則差別好大，但分別開始愈來愈少，係呢到就提幾點：

回合：職業4回合起，最多12回合；業餘3回合

量級：職業18個；業餘今次奧運男子有10個、女子3個

衣著：職業唔比著衫；業餘要著背心，本來要頭盔但今次奧運唔洗

計分：職業為10分制；業餘以前係punch-counting制，今年奧運又打返10分制

業餘計分方法轉又轉

咩叫10分制呢？就係一回合完咗，贏果個一定有10分，輸果個就有9至6分，睇佢打成點。如果輸果個輸少少，就俾9分佢；如果佢比人壓住嚟打，就俾8分甚至更低嘅分數。MMA加下都係用呢個方式計分，雖然好多人話唔好，裁判又太少比10-8呢個比數之類，唔好扯太遠，搵次先講MMA計分。

本來業餘同職業比賽係1988年前都係打10分制，但係1988年奧運之後業餘比賽就轉咗打punch-counting，原因來自當年奧運一場決賽。果年當時仲係業餘拳手嘅Roy Jones Jr代表美國參加奧運，打到決賽對戰韓國拳手朴時憲（Park Si-hun），雖然成場Roy Jones Jr壓住朴時憲嚟打，但係裁判都判韓國選手贏，事後好似話涉及貪污行賄原因。因為當時如果計擊中數，Roy Jones Jr多對手成倍，應該贏硬，不過喺10分制之下，裁判都係可以計朴時憲贏。果次之後業餘奧運就轉咗制，變punch-counting，一拳一拳同你計，睇你仲點出貓。

不過亦因為如此，業餘拳擊就變咗另一種運動。如果輕拳都計分嘅，點解要打一拳更慢更危險嘅重拳？結果業餘拳擊手就側重係拳嘅量，而唔係power同比對手壓力。中國拳手鄒市明當年由業餘規則轉去打職業都花好多功夫。

講返轉制，2013年AIBA又轉返計分方法做10分制，原因係話發現用punch-counting嘅話班拳手成日打頭，轉制更能保護拳手。我聽到果時真係笑出嚟，噤假嘅藉口真係好少見。其實就一句：punch-counting嘅比賽唔好睇，再咁落去無人睇就玩完啦！

成件事唔簡單

叫清楚明白件事之後，講返點解成事唔簡單。第一，職業拳手唔一定可以贏到業餘。職業拳手打一場之後可以休息幾個月，奧運賽制要你幾日打幾場，體力分配完全唔同；就算轉咗制，業餘拳手嘅打法唔係話轉就轉，佢地打返打點型遊走打法，職業選手都唔會習慣，依舊比人食住。大家要明白，比錢去睇職業比賽班人，想睇KO，就算你輸，但係你打得好睇，你都仲有得打；相返係職業比賽，你打得衰，公司唔鍾意，你條路就好難行。所以，既然職業拳手唔習慣面對業餘選手果種打法，咁輸嘅可能性就好大。

第二，就算班職業選手想打，都唔係話去就。拳手輸得起，但公司輸唔起：如果自家拳手輸比業餘拳手，以後仲點用個拳手嘅名氣嚟做生意？所以，公司用各種方法唔唔放人，好似WBC講到明，如果你去參加奧運資格賽，唔好意思，公司會Ban你兩年。職業拳手都係為搵食，兩年職業生涯好重要，試問又會有幾多拳手放棄生計去打奧運呢？所以，有幾多職業拳手參加奧運都仲係未知之數。

唉，搵食艱難呀，就算你係拳王都係咁話。

今次係咁先，下次再見！

（本文純屬作者意見，不代表香港01立場。）