從港版風之谷說起：香港人點解咁鍾意搵快錢？
聽聞係晚清先有「恭喜發財」呢句嘢……以前嘛，根本就冇財可發，恭乜鬼喜……香港人特別鍾意搵快錢。因為搵到，又用得到。我哋有最方便嘅方法，第度嘅唔係話想搵就搵到。你估度度打工仔可以lunch出去買六合彩然後交收iPhone再返公司炒輪？
又先講個故事。
宮崎駿1984年嘅動畫《風之谷》，1988年先在香港上。冇入場睇過嘅，你人生就錯過咗極美好嘅事情了。重點唔係有幾好睇，而係，當年呢套《風之谷》香港版，被稱為史上最爛翻譯，事隔30年而家仲有人講緊。而十分可惜地，新版嘅影碟已經重新配過音。舊版錄影帶同影碟相當難搵，新一代只能在我等老嘢口中知道傳奇。正如鄭伊健套《中華英雄》出碟時已經cut走咗結尾佢飛上月球嘅經典一幕。
當年港版《風之谷》有幾傳奇？除咗無中生有亂譯一輪嘅粵語配音外，最經典係仲有大量「恭喜發財」、「逗利是」之類嘅對白。《風之谷》都有得恭喜發財？嚟到香港咪有。當時當賀歲片咁推，死未。
新一代應該好難想像呢啲事情。肯定嘅係，香港人日夜不忘發財嘅文化，就源遠流長。
小弟教書年代，有位舊同事，電話嘅螢幕保護，係「六合常中」。結果畀老校發現咗，當眾鬧咗一鑊，話灌輸啲唔好嘅價值觀比下一代云云喎。天地良心，我舊同事人格高尚，亦係位好老師。呢個先係重點，唔好以為想中六合彩嘅只係師奶，其實香港地由小學生到CEO，個個都想搵快錢。
討論「搵快錢」呢個課題其實唔易，好容易變咗「金錢萬惡」vs「搵錢無罪」嘅二分法。一係就批評香港人膚淺云云（講呢啲嘅多數都冇乜錢），一係就講人性如此何罪之有，甚至話其實香港人都唔係咁（但解釋唔到做乜賣親iPhone公司都會好靜）。反正飲醉咗嘅當然話自己冇醉，搵快錢嘅人唔會話自己搵快錢。
我嘅睇法？我都係炒過iPhone賺過一萬幾千嘅人，近年「從良」唔再炒，主要係因為冇乜水位同太多人爭。我當然亦炒過股票炒過窩輪，唔止，我連月餅券都炒過。讀者可以睜大眼話自己唔係咁，叫我篇文唔好拉你落水，但就算真係好多人咁講，都改變唔到事實嘅。重點唔係「你」有冇搵快錢，nothing personal。
港人有幾愛搵快錢 打開報紙就知
對，香港人梗係搵快錢啦。話唔係嘅，我真係懷疑我哋係咪活在平行時空。iPhone開賣前有晒攻略，教晒你搶邊款（我鍾意個搶字），有乜分別，要預備乜。開賣日個個在公司起壇作法咁，閂晒啲無謂程式（主要係公司嘅Word呀Excel之類），去定洗手間，提早做晒啲嘢。媒體有晒即時新聞不停更新livescore，詳細過奧運。
同樣地，每次六合彩累積到咁上下獎金，你會見到傳媒專題報道，話你知點買易中啲，咩時間買易中啲，邊間投注站易中啲之類。 我甚至見過訪問梁思浩叫佢分享下「心得」。炒iPhone就話有心得啫，買六合彩都有秘笈分享，真係令我服到五體投地（又不過，賣下廣告，本人都寫過篇博評教你買六合彩。記住，唔會提高你中獎機會，但就減少你中獎同幾百人分嘅機會。）
【學吓逆向思維】台灣農曆七月避開刀？其實鬼節做手術存活率仲高
更不用講嘅係，你走入書局，打開報紙電視收音機，全部都係financial pornography。新股點認購，有乜國策股，南海打仗有乜股票受惠。工作去過唔少金融城市，香港係唯一一個街邊師奶都識乜嘢係「引伸波幅」嘅城市，咩倫敦紐約東京新加坡真係行埋一邊。
有得發財 先有得恭喜
以上嘅種種，仲唔係「搵快錢」？絕對嘅句子比較難講，但相對嘅比較就容易。你同我都心知肚明，點計都好，全世界嚟講，都好少有人好似香港人，或華人，咁鍾意又咁精於搵快錢。
唔好睇少《風之谷》一句「恭喜發財」，呢句嘢應該係華人社區獨有（OK，其實越南有，中國傳過去的。）就係呢句嘢話你知咩係血濃於水，或陶傑口中嘅小農DNA，將兩岸三地，新加坡馬來西亞印尼華人，以及歐美嘅移民後代，連埋一齊。鬼佬當然都入鄉隨俗，過年同我哋「恭喜發財」。但我好相信佢哋好難理解，亦少不免對呢種文化鄙視幾分。
不過，「恭喜發財」就唔係小農時代開始，聽聞係晚清先有呢句嘢。起源係洋務運動嘅廣州，中國人多咗同外國通商，呢句嘢亦揚威國際。以前嘛，根本就冇財可發，恭乜鬼喜。
講到呢度，就似乎開始明白，點解香港人特別鍾意搵快錢。因為搵到，又用得到。我哋有最方便嘅方法，第度嘅唔係話想搵就搵到。你估度度打工仔可以lunch出去買六合彩然後交收iPhone再返公司炒輪？
最緊要唔係活得好 而係活得比人好
香港由頭到尾都係一個商城，仲係一個「醒掌天下權，醉卧美人膝」嘅地方。你要吃喝玩樂酒色財氣，統統都有。唔好以為幸福係必然，想像下你在東歐某個小國，再有錢都好，你都未必有得現場睇麥當娜，亦冇得落街食米芝蓮三星，甚至等部iPhone都等幾個月。畀你拎到部亮黑色iPhone都唔係可以拎去公司樓下散貨啦。
好多人寫過，近代中國多災多難，華人顛沛流離，缺乏安全感，香港亦然。上次篇博評講《我至叻》同《話知你97》都反映到呢種不安，今朝有酒今朝醉，有錢就有得命運自決嘅心態。
更重要係，香港地唔止紙醉金迷，仲要人口密度高，資訊又發達。咁會點？呢個就係一個樣樣都會同人比較嘅城市。由讀書比讀邊間讀邊科用乜電話去邊間做intern去邊度exchange，比到做嘢寫字樓邊區去邊旅行住乜酒店食乜，到比買樓住邊區MPF供邊間，老婆去邊生仔個仔去邊度Playgroup。係，literally到死嗰日都仲可以比較請邊個嚟唸經包邊個場燒假錢定真錢。
在我城，最緊要唔係活得好，而係活得比別人好。
唔想咁樣？好簡單啫。改變唔到環境就改變你心態嘛，接受佢啦。都係心理唔平衡嘅，學點醒屈原個漁父話齋，人人都醉就自己隊冧埋自己啦。If you can't beat them，join them。
改變唔到心態又唔想同流合污但又睇唔順眼嘅，更加簡單，移民啦。唔係晦氣說話，香港人乜都要比較令人好累，係我一個移民多年嘅親戚講嘅。你搬去台東包你冇地產霸權冇iPhone你炒。不過呢，要移民，首先就要有錢……對，我親戚當年都賣咗層樓搵到快錢先移民英國的。
（文章純屬作者意見，不代表香港01立場。）