最近內地有場比賽好多人討論賽前討論好多，賽後爭議亦好大只想講一句：「如果係輸唔起，不如一開始唔好打」

講講背景，11月5日內地比賽《武林風》，播求對一龍，呢次係兩位拳手第二次對戰。

播求，泰拳手，兩屆K-1 World Max世界冠軍，喺香港玩泰拳嘅人傾傾下計都會提起佢，可以見到有幾勁，雖然已過巔峰，但依舊係一個十分利害嘅拳手。

「武僧」一龍，唔係好識講，佢話自己係少林俗家弟子，識金鐘罩。唔可以話佢喺搏擊運動無成績，亦唔可以話佢完全唔掂，佢有贏好多比賽，但好多都係內地嘅。無論如何，佢喺內地人氣好大，好多人識，同時亦好多人話係炒作。

2015年6月6日，兩位拳手第一次對戰，被《武林風》叫做《世紀大戰》，算啦，名一個，叫咩都好。嗰場比賽，播求贏點數，當時爭議已經好大，唔少人覺得一龍贏、亦有人覺得播求贏，總之一龍唔服氣，話要再打，結果一年後得償所願。

賽前討論

首先係關於規則。呢場比賽無肘，埋身膝擊只可以一下，唔可以連環用膝，對泰拳手不利。但係規則呢樣嘢就打之前講好，播求自己肯，再討論都無謂。

另一點就好重要，有網民認為，《武林風》唔能夠俾一龍輸。面對唔同搏擊比賽嘅競爭及壓力，加上高層變動，作為「台柱」嘅一龍如果輸咗，對《武林風》嘅打擊並唔細。加上，內地有好多觀眾都係睇熱鬧，每次比賽都要有國家情意結，贏就捧上天，輸就一沉百踩，呢種玻璃心搵次再同大家講，只係呢種情況加劇咗「一龍輸咗」對《武林風》嘅打擊。

所以，有人話除非播求可以KO一龍，唔係打到判定佢輸硬。結果一語成讖。

賽後爭議

我嘅意見係，無理由播求呢場會輸。就算摔無分，但全場打擊量、準繩、力度，播求都佔優，所以判一龍贏之後，網上反應好大（當然都有支持一龍贏嘅人，但唔多，在此歡迎討論）。

最耐人尋味嘅係一龍賽後，當時仲企係台上，講咗句：「這場比賽其實沒那麼簡單，太複雜了」，之後再講公司有好多嘢要預備之類。究竟係想多謝唔同工作人員嘅努力，定係有其他意思？大家真係要自己估下。

我認為，如果係輸唔起，就唔好打。放得規則出嚟，就應該遵守，用任何手段去影響賽果，都係件對唔住拳手、對唔住觀眾嘅事。

就算改計分方法，唔係每個回合計，而係計整體，類似以前Pride Fc嘅計分方法，都應該無用。用一個人贏，點都可以俾一個人贏。

「今次總算令播求試試被黑滋味」

網上有少數人支持一龍勝出，但更多嘅人認為《武林風》當觀眾係傻仔。

不過有人認為「今次總算令播求試試被黑滋味」，呢種諗法值得回應一下。因為第一場比賽差距較細，所以有人覺得上次一龍被不公平對待，今次就到播求。呢種諗法，係一種扭曲嘅報應觀。唔公義嘅事，發生一次都嫌多，並唔係「大家都受過不公平對待，所以公平」，呢個世界唔係件件事都負負得正。真正有質素嘅觀眾，唔會有呢種諗法。

最近一星期心情沈重，變晒個人心情抒發。今次係咁先。

（本文純屬作者意見，不代表香港01立場。）