文開首想講一講，巴甲球隊查比高恩斯遇上空難，雖然我唔係咩資深球迷，但作為一個鍾意運動嘅人，亦感到十分傷心。願佢地安息。

—

首先科普一下，LGBT係女同性戀（Lesbian）、男同性戀（Gay）、雙性戀（Bisexual）、跨性別（Transgender）嘅簡稱。好多運動入面，女同、男同都係一個禁忌，好多人都唔會講，亦唔敢講，但呢幾年情況好轉，好多體育明星同團體都出聲支持LGBT community，例如呢個星期英超足球員嘅隊長臂章都用咗彩虹色嘅帶（一個表示支持LGBT嘅simbol），表示英超對LGBT嘅支持。

武術方面，真係各有聲音。UFC印過有彩虹字「We are all fighters」嘅tee去支持；現任女子UFC Bantamweight冠軍Amanda Nunes亦公開承認自己為女同性戀者。

當然亦有無咁friendly嘅例子，網上有好多拳迷都唔鍾意LGBT。而拳手方面，菲律賓拳王Manny Pacquiao就公開講過一D對同性戀嘅歧視言論，引起好大回響。

眼見回響咁大，佢就係喺Instagram引用聖經回應：

當然結果係仲多人嬲。後來佢有拍片道歉，解釋自己只係依聖經講，唔係譴責LGBT。但最後NIKE都係同佢解咗約。

如果男女同練無問題，同性戀者都無問題

我唔認為同同性戀練拳有咩問題。覺得同同性戀者一齊練好「危險」嘅人，犯咗一個好大嘅思想錯誤，就係認為所有同性戀者都係控制唔到自己嘅色情狂。你會唔會覺得，男仔同女仔一齊練拳嘅話，個男仔就一定會侵犯個女仔（或女仔侵犯個男仔）？如果唔覺，又憑咩認為同性戀者「危險」？如果你本來就覺得男女都唔應該一齊練拳，我就真係無話可說，只能話你思想太古舊，都幾難適應現今社會。

Transgender引起嘅爭議

我唯一立場唔肯定嘅係關於Transgender去打比賽。練拳就肯定無問題，但一到打比賽，就有運動公平嘅問題。男性平均骨架較大，肌肉力量亦同女性唔同，雖然個體差異可能比性別差異更大，亦本來就有大力過男仔嘅女仔，但睇返平均數，會唔會有唔公平嘅情況呢？

Fallon Fox，就係一位由男性轉為女性嘅MMA拳手，佢嘅爭議好大。UFC 旁述Joe Rogan 同 著名拳手Bas Rutten都有出聲講過唔公平。 UCLA社會及遺傳學研究所（The UCLA Institute For Society And Genetics）嘅Eric Vilain博士就持相反意見，佢認為由男變女嘅跨性別人士對比起男性，有更少嘅肌肉力量同骨質密度，同時有更高身體脂肪。佢認為，男變女嘅跨性別人士要打比賽，就必須要經過完整嘅變性手術同激素療程，而Fallon Fox都合乎上述條件。但係，同Fallon Fox打過嘅Tamikka Brents，就話佢未遇過咁強壯咁大力嘅女性，而佢亦覺得Fallon Fox可以打女子比賽對其他女拳手唔公平。

睇返國際奧運委員會於2015年11月嘅指引，由女變成男嘅跨性別人士可以參加男性比賽而無限制。而由男變女嘅跨性別人士就有幾個限制：第一，當佢話自己係女性之後，於體育運動上最少四年唔可以轉；第二，比賽前嘅12個月，睪丸素都必須喺10 liter以下；第三，如果唔肯驗，就唔準參加女子比賽。

但係我都係覺得，於公平性上，呢個問題仲有好多討論嘅空間，話唔定第時可以com個更好嘅方法去解決呢個問題。

今次係咁多！

（本文純屬作者意見，不代表香港01立場。）