其實我唔贊成街頭打交但係FB一打開成班人tag我叫我講幾句就簡單講幾句

先以武論武。

進攻意識

一開始大家正架（左前右後），皮褸哥先出左刺拳再右直拳。刺拳有好多作用，其中一個係搵距離，另一個係妨礙對方出拳，呢兩點皮褸哥都有做到。0:09喺clinch之後紅藍哥轉咗反架 （右前左後），皮褸哥如果出左手刺拳嘅話會被neutralize，所以右拳先發。

但單獨無set up之下出右直拳，右拳命中率下降，所以即時轉用低掃踢腳。而又因為係正架對反架，出後腳打對方前腿內側，即出inside low kick/leg kick係十分合理嘅。仲有，街交都唔踢要害，都真係好君子。

而中間被clinch時，俾紅藍哥打咗一拳後，皮褸哥選擇打身走都好有sense。

紅藍哥問題

會拉弓出拳、上半身過份緊張、fing拳想fing得中，都係呢類片入面嘅人常常出現嘅情況。但其實紅藍哥已經俾好多人做得好好多，都唔係完全唔識。

皮褸哥打咩拳

我估佢個base係Boxing，但有學埋kicking（Kickboxing？），因為泰拳個馬通常好少咁大。當然Boxing入面無踢技，但人唔係玩嗰樣就要用死嗰樣加嘛，話唔定學過幾招踢技呢？佢亦可以係個馬好大嘅泰拳practitioner，所以我唔覺呢個問題重要 。一個人係好多樣嘅，個體技術差異有時仲大過門派差異。同時，唔同武術都可以有同樣招式。

唔好打街交啦

雖然兩位打得精彩，但我唔贊成打街交。今次皮褸哥君子，唔踢要害，紅藍哥都打拳頭交，就唔係太大件事。如果真係火起上嚟，其中一位攞武器，情況會好危險。

睇返報導（下有相關文章），話「拍片者鄭先生向傳媒表示，昨日（周一）下午路經荔枝角道中石化加氣站，剛巧目擊兩名的士司機在站外爭執，懷疑因排隊爭位入氣的問題爭持不下，繼而動武，所以舉機拍攝。」

同時今日好似又有另一段的士哥哥打交片段，大家怨氣都好大。雖然唔係話你唔犯人，人就不犯你，但自己安全有時就重要過啖氣。大家以和為貴呀！

今日係咁多！

（本文純屬作者意見，不代表香港01立場。）