2月初，國家外匯管理局就要求多間大型保險公司，限制內地客碌卡買保險上限為5000美元，以防大規模走資。不過，你知我知，如果內地人要運錢出國，又點只碌保單一條路。

近來家母一同班師奶朋友飲茶，都必定八吓邊間銀行做人仔定期最抵。無嘅，人民幣之前無間斷地連升幾年，被師奶們當risk-free asset咁愈買愈多，近月匯價卻愈跌愈深，最具市場觸覺的師奶們自然要諗一諗如何食息回本。

內地大媽運錢出國多路數

當香港師奶仲可以靠銀行高息減少匯率損失，內地大媽就冇呢支歌仔唱。人行連番減息托經濟下，內地銀行提供的定期息率已今非昔比。與其坐以待斃食低息，大媽就用盡方法，希望繞過外滙管制將大批人仔資金轉離人民幣。

例如，唔少內地客早前就透過落香港「碌銀聯卡」，瘋狂購買美元、港元保單。因此2月初，國家外匯管理局就要求多間大型保險公司，限制內地客碌卡買保險上限為5000美元，以防大規模走資。不過，你知我知，如果內地人要運錢出國，又點只碌保單一條路。

哪裡有利潤，哪裡就有市場。無論政府如何高度限制，上有政策，下就有對策。早於幾百年前，明朝立國之初，朱元璋為了阻隔海外威脅，曾嚴令「片板不許入海」，即禁示民間進行海外貿易，違者處以充軍甚至死罪。因此，明朝與海外聯繫就只剩下外國使節前來朝拜、進貢禮品及還禮等有限度的官方途徑。

不成熟的政策　敵不過市場

雖然朝廷落下「禁海令」，但中國商人明知海外貿易有利潤，又點會唔賺盡。因此，部分商人除了在海外建立貿易基地，走私活動亦在高壓管治下衍生，甚至於後期發生海盜燒殺搶掠，以佔領明軍的海防及建立自己的基地。

在朝廷長期與市場站於對立面下，「禁海令」最終在200年後取消，海盜問題亦終於平息，而中國對外貿易亦迅速發展起來。不過，當時正值西方國家展開大航行時代，中國卻失去了外貿發展寶貴的200年。

Fast forward番幾百年，中央一方面想人民幣國際化，一方面又禁呢樣禁嗰樣以防人仔匯率大幅走低，其實歷史已不斷提醒我們，任何不成熟的政策，最終仍敵不過市場。

【編按：筆者為八十後財經公關，大Deal細Deal通通做，business trip出唔完，新聞稿寫唔晒，但見盡銀行家、公關傳媒界的奇怪異事。】

（本文純屬作者意見，不代表香港01立場。）