【七警案．來稿】回應《一名警員回應一名警務督察的自白》
本來兩位警務人員嘅筆戰，我都係食住花生咁睇，但係睇呢篇《一名警員回應一名警務督察的自白》，愈睇愈唔對路，唯有以普通市民身分打幾隻字回應下。
文：余未
點解對警察咁苛刻？
依位警員問到，唔知幾時開始，社會對警察特別苛刻。如果佢嘅意思係點解我地對警務人員嘅要求，會比對一般市民要高嘅話，我唔會否認係有依種「苛刻」。但係好抱歉，依種所謂嘅苛刻係必要嘅，亦都係一向都存在，甚至化身成為官方文件出現。
為咗令警察方便執法維持治安，社會賦予警隊各種一般人冇可能擁有嘅權力、手段同工具。警方可以拘留一個人四十八小時，一般人咁做，叫做「非法禁錮」。警務人員遇襲時可以用對稱暴力還擊，一般人咁做，叫「在公眾地方打鬥」。任何公權力都需要被監管，有超乎常人嘅權利，自然要守比常人更多嘅規矩。
警務人員除咗要遵守香港法律外，仲要遵守多一份《警察通例》。《通例》有好多規矩，例如唔可以參加政治活動，甚至可能因為財政問題而被紀律處分，呢啲規矩一般人係唔會遇到。呢位警員會唔會話《通例》令都係社會對警察苛刻表現嘅一種，要求廢除《通例》呢？唔會，因為你都知道《通例》係規管警隊所必需。
除咗規則之外，為咗等警務人員更好咁執行職務，警隊每年都花費唔少時間同資源晌訓練之上。警隊嘅訓練，就係為咗等警務人員有比一般人更優秀嘅判斷力同情緒控制能力，嚟去運用手上嘅公權力。如果警務人員犯咗錯，又走去問市民點解唔可以用對待一般人嘅眼光嚟對待警方，咁我真係想問下，花咁多時間資源晌訓練度，到底係為咗咩呢？
講白啲，警務人員手上嘅公權力可以隨時令小市民叫天不應叫地不聞，又持有可以置我於死地嘅武器，市民唔對你地苛刻，應該對邊個苛刻？
警察是甚麼？
警隊係維持社會治安重要一環，市民對警隊係有極高嘅期望。市民希望警隊能夠公正執行職務，拘捕懷疑違法亂紀之人，交俾司法機構作出審判。晌依個維持社會秩序嘅制度之中，警隊嘅角色係執行者，而唔係仲裁者，佢唔會、亦都唔應該有判斷邊個人有罪嘅功能，更加唔應該發展出自己嘅一套「正義」觀，利用依套觀念嚟決定如何行事，將社會法規擺埋一邊。
所以，當有警務人員晌度講七警係「出於正義」而向市民執行私刑，其實係傳達出一個好危險嘅信號，就係晌法律之上，警隊認同自己要有一套「辨別善惡」嘅機制，會根據警務人員自己嘅判斷，晌疑犯上法庭接受審訊之前，對疑犯作出法律以外刑罰。
社會之所以需要法律，就係避免社會上每個人根據自己個人嘅善惡觀，用私刑嚟去解決紛爭，做成社會嘅混亂。法律講求嘅係公義，係跟隨程序去判定被告人是否有罪，而七警嘅行為就係以私仇蓋過公義，以衝動取代程序，正正係對法律精神最大嘅不敬。警察就係為咗取代私刑而設立，有警務人員帶頭執行私刑，係對警察存在原因最大嘅否定。
警察有冇包庇七警？
我真心希望寫果篇文嘅警員唔會口不對心，係真係「不贊成警察濫用私刑」，「對任何犯法行為予以讉責」。如果係咁，我唔知依位警員晌二月廿二號晚，出席警察遊樂會嘅集會果陣，到底係咩心態。晌會上，你地有表達自己唔贊成警察濫用私刑嘅意見嗎？你地有譴責七位晌法庭被判有罪嘅私刑執行者嗎？
「警隊唔贊成警務人員濫用私刑」，「警隊唔會對警務人員嘅犯罪行為推搪或掩飾」，依兩個立場係市民對警隊最基本嘅要求，市民亦都唔會接受任何背棄依兩個立場嘅事件出現。由七警案判決宣布後，市民見到嘅正正係警務人員晌依兩句之後加上無數嘅但係：「警隊唔贊成警務人員濫用私刑，但係為同袍出口氣就要支持」，「警隊唔會對警務人員嘅犯罪行為推搪或掩飾，但係佢地係受到挑釁先會咁做」，種種前後矛盾嘅句子，就係你地為自己同袍犯罪行為推搪掩飾嘅最大證據。
要令到市民相信警隊冇包庇七警，方法其實好簡單，只要警隊中人行出嚟，講一句「不容忍任何私刑執行者留在警隊」，譴責佢地嘅行為，將壞份子革除職務，市民就會相信警隊係真心誠意撥亂反正。可惜，七警案判決後，警隊由警務處處長到普通警員，都冇一個人公開走出嚟講依番說話。
總結
客觀以案情嚟講，七位警務人員晌執勤之時以私刑對付對其他警員淋液體嘅示威者，俾電視台拍低晒直播出街，證據確鑿，相信就算點支持七警嘅人士，都唔會話佢地冇做過。既然做過，為此事負上責任就係應有之義，亦都係法治社會人人都預計到嘅一個結果。正如「誠實嘅謊言」一樣，依個世界亦都唔存在「公義嘅私刑」，因為私刑依樣嘢本質就係同公義相違背。
七警執行私刑，不論係為咩原因，絕對唔會係因為「正義」或者「公義」，不論係警務人員或者支持者，都無謂再混淆視聽喇。
警隊係執法部門，係紀律部隊，以香港法律及《警察通例》為綱，以紀律為管束，以市民為服務對象。當有一半嘅警務人員支持私刑執行者嘅理據「不是法而是情」，以同袍之誼為優先，置法律與紀律不顧，無視市民對佢地嘅要求，係人都知警隊晌觀念上出咗好大嘅問題。
依位警員，如果你真係認為你「要擔起別人沒有的義務，包括失去一部分別人享有的自由，還要擔起一些別人沒有的道德枷鎖」，而無視依啲義務同枷鎖背後嘅意義，我覺得你已經唔適合留晌警務人員嘅崗位了。何不脫下警服，享受「沒有道德枷鎖」嘅生活呢？
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）