其實起得呢個命題，我知道無論點答都會得罪人。與其俾人標籤係黃絲定藍粉，倒不如我嘗試用一個比較貼地啲嘅角度，等大家自己分析吓。因為，我深信大部份香港人係有common sense和判斷能力嘅。

文：好唔打得

首先我必須自我申報。本人係教開拳嘅，自少習多家武術門派，中西泰日韓咩都有。現任一間上市公司嘅Marketing Director，所以唔方便開真名。但如果喺廣告界打滾過嘅可能會估到我係邊個。

就住近日所謂「MMA」和「太極」嘅比試，其實反映出好多人對中國功夫仲有一種武俠小說式嘅浪漫同遐想。例如，每個門派都應有一位掌門人，呢個人功力深厚，擁有超級必殺技，世人亦稱之佢為做——高手！

通常，呢類高手都有番咁上吓年紀。亦間唔中會捐入個山窿度進修下，閉關練功。利用冥想及打坐，或者九陰真經呢類武林秘笈去提升戰鬥力。雖然我形容得比較誇張D，但我諗大家已經get到我想講咩。

至於佢啲徒弟仲型。

首先，要練三五七年紮馬 (基本功嘛，無計啦)。然後開始學套路，平均每兩年一套，每套一百幾十式，大約二十年左右就畢業攞番個大學Degree。之後，如果咁好彩俾高手/師父睇中，做埋入室第子嘅話，咁就巴閉咯。

恭喜你!  上到呢個碩士/博士階段，師父會開始慢慢過啲堅野俾你，例如咩內功心法，鐵布衫之類 。

到時候，你應該都幾十歲啦吧。不幸地，你師父亦同樣年紀不輕，記憶力和體能都嚴重衰退，所以佢教嘅野都未必準確。而最慘係大多數師父都鐘意收埋一招半式，最後瓜柴個陣先想教你已經太遲。所以每一代都最少失傳/唔見咗兩成功力。

再share多個現代版本俾大家。話說有個四眼仔叫「小明」，16歲，成日比人恰。所以在某個暑假終於鼓起勇氣走去學武傍身。最後上網搵到間合心水嘅館，師父仲好出名添。

第一日上到去，小明見到好多兵器，木樁之類嘅野，個個著晒制服，又有冷氣，感覺好舒服，佢立即交學費。搞掂之後師父就會同你及一班新仔一齊開拳，教你兩野。大約15分鐘之後，有位師兄嘅人物就會過嚟對你指指點點。實際上，佢將會係小明往後大部份時間嘅導師，而唔係佢師父。呢類情況通常喺大館會好普遍。

雖然呢個年代唔晒話紮馬三五七年，但小明都要由基本功學起。但係唔想咁悶，除咗套路之外，小明都會接觸到所謂「對拆」和「散手」呢類野。簡單啲講，就係對方攻擊你時，你點擋同反擊。而呢類攻擊通常係有規律性，估到對方點出 ，比較輕手，同埋對方唔會有反抗。慢慢地，小明就覺得自己好好打。

話咁快就過咗兩年 (唔使二十年) ，小明已學會多套套路和技巧，師父仲開始親自教佢添。好似今日又塞錢入小明袋啦。師父說：「小明，你打拳出嚟 ，右腳踏前出右拳，打心口位高啲。」然後小明就恭恭敬敬咁打出一記輕量版天馬流星拳。

喺電光火石之間，師父瀟灑地踏入小明45度完美死角，然後做出一連串屈機嘅動作。小明心諗——掂晒！就係用呢招對付班上面成日恰佢嘅小強。兩日後，亦即係小明18歲生日嗰日，小明約咗小強出嚟比武。至於小強呢，佢本身係籃球隊，每日跑10km，亦玩開泰拳做gym。

故事講到呢到，大家諗下小明最終會否成功？

以上嘅故事純屬虛構，如有雷同，實屬巧合！

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）