一年球季又要完，除咗歐聯以外，四大聯賽各項榮譽都塵埃落定。洛迪高就醒起，當每支球隊踏上頒獎台時，你總會見到一兩個球員，成季好似無咩見過佢，直到領獎牌時你先發現佢嘅存在。以而家時下叫法，應該可以叫做「Free Rider」。

文：洛迪高@世界波

雖然咁講唔多公平，但如果講起Free Rider，大家可能都會諗起門將，所以筆者呢度就會拎拜仁慕尼黑門將烏里治（Sven Ulreich）講下。大家都意識到拜仁喺德甲嘅霸主地位，仲可以連年有實力爭歐聯，連頂級球星好似維達爾（Arturo Vidal）都要慕名而來，其他無咩機會拎冠嘅二線球星就梗係唔會錯過，其中一位就係前史特加門將烏里治。喺投效拜仁前，27歲嘅佢已經喺史特加主力門將，踢過德國青年梯隊甚至有機會入選國家隊。不過佢喺15年就毅然選擇去拜仁做紐亞（Manuel Neuer）副手。如果佢話自己係想挑戰紐亞地位你會唔會信？ 佢今季為拜仁上陣夾埋7場，已贏得德甲冠軍。不過只要佢跟住拜仁，應該都不乏其他奪冠機會。 其實球員點會想做Free Rider呢？ 有時都唔到佢揀。講緊嘅其中一個例子就係史篤城荷蘭中場阿費利（Ibrahim Afellay）。佢第一季投效巴塞隆拿時就拎到西甲冠軍，不過佢只係上陣咗16場，加埋660分鐘，即係每次出場都係41分鐘左右。然後佢因為受傷以及因被租借在外，最後喺11/12以及13/14球季為巴塞加埋上陣7次，最後離開前喺自己榮譽簿上添多2個西班牙超級盃以及1個西班牙盃。 另外一位值得一提嘅就係普多斯基（Lukas Podolski）。普多斯基由04年開始，為德國出戰六次國際大賽，但重要性越嚟越低，甚至有好多聲音認為佢唔值得入選國家隊，去到最後16年歐洲國家盃就只係後備一次，隨後就正式退出國家隊。最後佢喺14年巴西世界盃從未踢過完整90分鐘比賽，就近乎以球隊吉祥物身份奪得世界盃冠軍。

Free Rider除咗坐享其成之外，仲有咩特質？ 其中一個就係藉口多多。阿仙奴教頭雲加（Arsene Wenger）喺轉會市場上都算係一位Free Rider。點解？ 大家仲記得雲加「險簽系列」嗎？ 喺每次市場出現一啲焦點收購，甚至有位球員成名後，都係見到雲加表示佢曾經有機會簽下嗰位球員，例子就係有雲加邀請過佢試訓但請教授食檸檬嘅「戰神」伊巴謙莫域（Zlatan Ibrahimovic）以及畀費Sir（Sir Alex Ferguson）虎口奪食嘅C朗拿度（Cristiano Ronaldo）。至於成日畀人搶走目標然後出嚟攞下彩話自己一早睇中咗嘅例子，近期就有炙手可熱嘅基利安麥巴比（Kyllian Mbappe），雲加就表示直頭去過基利安屋企想簽佢可惜失敗……

另外，筆者就諗起保辛華（Jose Bosingwa），車路士喺2012年勇奪歐聯，保辛華喺決賽後捧盃時搶晒鏡唔只領獎時十足隊長咁，仲成程黐住個盃，令人覺得佢黐盃捧，但其實佢成個球季唔止有上陣同歐聯決賽踢足全場，杜奧巴（Didier Drogba）仲話佢係歐聯決賽另類功臣，因為佢同教練主動講代替伊雲洛域（Branislav Ivanovic）踢中堅先可以踢到最後捧盃。

一支球隊係一個球季，或者一支國家隊係大賽，都未必用得晒所有球員，但唔代表佢哋無用，有時候佢哋都有佢哋本身作用，吉祥物都有用嘛係咪先？

（文章純屬作者意見，不代表香港01立場。）