【任噏亂評】譚芷昀真係贏在起跑線 有幾多天才童星被埋沒？
今年只得9歲的「香港小巨肺」譚芷昀(Celine)近日參加《全美一叮》(《American’s Got Talent》)第12季比賽，選唱《鐵達尼號》電影主題曲《My Heart Will Go On》而一戰成名。該節目Facebook專頁及YouTube官方頻道只是一天便有超過2500萬和460萬瀏覽量，不少人都稱讚她的歌喉。一名得9歲嘅小朋友，能夠喺台上唱隻咁高音嘅歌，而且仲咁有台風十分鎮定，睇得出係久經訓練。其實Celine喺呢個節目之前已經參加過唔少歌唱比賽，大大話話都有成廿個，已經有唔少喺中國參加乜乜晚會嘅機會，佢自己都曾經喺四年前開個個人演唱會，認真巴閉！
點解細細個就可以咁有型有格？除咗有天賦之外，皆因佢仲有個好爸爸！譚順生（Steve）作為一個專業的唱歌及鋼琴老師，一早就已經發現囡囡嘅音樂天份，所以除咗自己培養佢之外，仲送咗佢去家燕媽媽藝術中心度學唱歌跳舞。而且還不時帶佢出去表演，除咗之前訪問透露過會帶囡囡去地鐵唱歌練膽量之外，還會運用自己的人脈關係為囡囡爭取更多演出機會。根據其他傳媒報導，為了唔影響Celine的學業，Steve寧願自己辛苦都要住喺月租成七萬蚊嘅山頂單位，就係為咗囡囡可以讀該區嘅國際學校，認真唔話得！當然，作為一名專業的音樂老師要拎出呢啲錢其實唔係咩問題，所以Celine在天賦同後天培養方面都可以話係得天獨厚，成名絕對唔係僥倖！
但係，如果剩係得天賦，無咗後天培養又會係點呢？如果Celine唔係出身一個音樂世家同埋叫做有返咁上下家底的話，佢而家條路又會係點行？起碼如果佢屋企唔係有錢，未必可以俾到錢佢去美國表演，唔會可以跟到家燕媽媽學嘢，更加未必可以行唱歌呢條路，因為靠唱歌未必搵到錢。而家普遍家長都覺得讀書先係最重要，音樂、運動、藝術等等只可以當係興趣，上吓興趣班係無問題，但唔好當係一個終身職業囉！如果唔係點會有人講運動其實無乜貢獻，又點會有咁多為咗唱歌捱窮捱餓嘅歌手出現，講到底都係香港普羅嘅價值觀係咁，有人話過香港其實係一個文化沙漠，都唔可以話係錯晒，因為好多人都為咗現實而扼殺咗好多可能性。好在Celine爸爸本身都係音樂人，唔會存在歧視藝術的問題，又好彩佢老爸並唔係一個窮嘅音樂人，如果唔係可能變咗帶個囡出街頭賣唱。亦都因為有錢，佢唔使焗限喺香港參加節目，可以返大陸出美國，你知香港人幾咁鍾意乜都踩幾腳，如果同一個情況喺香港發生，可能就會出現話Celine老積、扮大個、亂嗌一通，未必可以好似喺美國咁得到咁多人嘅讚賞。
想當年趙展彤12歲參加《超級巨聲》，先唔好談論兩個人唱功上有無高低之別，但當年一出已經負評如潮，根本沒人留意她的歌聲。一來是因為當年還細的她態度性格問題有被宣染，二來又未必有人好像Celine爸爸Steve一樣咁熟悉呢個行業去教佢，所以Celine今次成功其實背後需要有好多支持先做到出嚟。比著係窮人家庭，Celine可能都會俾人讚唱歌好好聽，不過只係讚吓囉，可能佢屋企人會多啲帶佢出去唱K拎吓虛榮感，之後？咪繼續讀書返學囉。喺學校可能可以參加吓啲歌唱比賽拎吓獎，之後俾人發掘吓，從一個窮家出身的歌手出發，浸返幾年可能會出名，又可能因為時間磨蝕晒所以靈氣，總之好難會去到而家喺美國獻唱嘅人氣高度。說到底，起跑線真係好重要，因為可以令你事半功倍，加埋marketing嘅包裝更加可以令你一夜成名。我地唔係要去質疑Celine嘅能力，而係應該檢討吓有幾多個Celine無被發掘出來。
