香港大專聯校搞麻雀大賽 謝安琪都畀Like
撰文：李妍樺
出版：更新：
麻雀係中國偉大嘅國粹，裡面蘊藏博大精深嘅智慧，喺香港麻雀經常被大家直接聯想成賭博，歸類為唔好嘅習慣。以前讀書唔好講話打麻雀，就連玩啤牌都會畀老師鬧，甚至係記缺點，上年香港中文大學就突破性搞咗個「麻雀研究學會」，開班教各位大學生打麻雀，又會鑽研各地嘅牌規，當然就唔會涉及賭錢啦。點解會有呢個諗法呢？事源就有同學喺「中大Secrets」嘅Facebook上面提議既然大家咁鍾意打麻雀，點解唔整個學會係研究打麻雀呢，真係冇嘢係冇可能，麻雀學會就咁誕生咗。
唔係講笑，中大真係開咗個麻雀研究學會。（網上截圖）
打牌都有Joint-U比賽？（網上圖片）
近日仲發大嚟搞，整咗叫「香港大專聯校麻雀大賽」，邀請八大同埋其他大專院校嘅學生參加，預計喺8月舉行。今次絕對唔係得個講字，比賽已經Ready喺下個禮拜公開畀大家報名，引得唔少同學都Tag埋身邊嘅雀聖雀后一齊參加，就連歌手謝安琪都畀個Like啊！讀香港大學嘅阿Kay之前接受訪問就話自己唔識打牌，成日都唔知幾時食糊，仲自嘲係「魚腩部隊」，唔知大專院校嘅同學仔會唔會邀請阿Kay呢個校友嚟戥腳呢？
個Page仲有教你麻雀小貼士，都幾搞笑：
唔通阿Kay都想參加？（網上截圖）