無綫小花鄧美欣（Venus)今晚（10/2）現身奧海城出席無綫新劇《痞子無間道》首播晚宴。對於劇集今晚首播，venus接受《香港01》訪問時大感興奮：「今次呢套古裝劇係我入行以來第一套，之前都會成日諗，幾時先有機會參與古裝劇集嘅拍攝，點知諗吓諗吓，有一日就收到通知，安排我演一個角色，聽到呢個消息，嗰一刻難以置信，竟然有我份。好多謝監製俾呢個機會我，同埋今次呢套劇，我隻愛犬常威佢都有份演出，最開心就係可以同佢一齊拍劇，同埋狗狗都有片酬，始終機會唔係成日都會有。」

venus亦都好感謝台前幕後的工作人員，對愛犬照顧有加：「試過有次喺古裝街拍嘅時候，當時正值夏天，天氣都有啲熱，劇組佢哋見到狗狗熱到喘晒氣，到一停機嘅時候，就會帶佢去到啲陰涼嘅地方休息，同埋會攞水俾佢飲，真係好多謝佢哋。」