【仲講龍哥？】蘇民峰出山Rap新歌 重奪玄學家Rapper一哥地位
撰文：何志衡
出版：更新：
龍哥獨有嘅freestyle超度方式令佢迅速成名，坊間有人惡搞成Rap歌版本，不過龍哥好快就out咗，連《BigBoys歷險記》都cut晒佢啲「戲」呀陰功！不過講起玄學界Rapper，都好難取代到大家心目中的蘇師傅蘇民峰，而咁啱蘇師傅最近都Rap咗新歌喎！
蘇民峰好努力咁Rap歌。
其實10年前蘇民峰已經為有線嘅《峰生水起精讀班》唱過主題曲，當年都係Rap㗎！仲早過麥玲玲同農夫首《風山水起》。今年奇妙電視新節目《中伏》亦由蘇師傅主持兼唱埋主題曲，蘇師傅喺佢專頁都有放少少錄歌時嘅花絮，冇唱10年師傅好似有啲緊張，開頭跟唔到音樂，但係監製提咗句佢就即刻跟到喇！可惜片段太細聲聽唔清楚師傅唱乜，但都聽得出佢係Rap緊歌。
蘇民峰日前為《中伏》錄影。
雖然有蘇師傅坐鎮，但原來個節目係同玄學無關，點解呢？據聞又係被TVB嘅潛規則所限，事緣蘇民峰喺「Big Big Channel」有個玄學頻道，會開live講2018年生肖運程，於是乎就唔可以喺其他電視台做玄學節目嘞。
咁《中伏》係咩節目呢？奇妙電視回覆：「係一個講法律漏洞嘅節目，例如你做咗啲行為可能犯咗法都唔知，咁就中伏。」而蘇民峰係主持之一，每集會請一啲律師、名人等做嘉賓，而蘇民峰首歌好快就有得聽喎。
10年前蘇民峰已Rap過主題曲，當時龍哥都未有人識。