【3日2夜】張曦雯keep fit唔需要戒口:最鍾意食漢堡包同薯條

撰文:溫菁莉
出版:更新:

擁有「打機女神」稱號嘅張曦雯(Kelly)人靚身材好就係人都知,尤其是近日TVB播出的節目《3日2夜》中,Kelly就帶觀眾到毛里裘斯感受陽光與海灘。但不少女觀眾就似乎將焦點放在Kelly嘅美好身段上,究竟要點樣keep fit先可以有佢咁好身材呢?張曦雯接受《香港01》訪問時就話,「鍾意食咩就食咩係最好,但要適量咁食,咁樣自己會開心啲!」

《3日2夜》每個星期播完後,張曦雯都會成為被討論嘅對象!
+7

Kelly透露一起身之後會飲暖嘅薑溝蜜糖嘅水,之後先再食早餐,「其實我覺得如果減肥只可以食一樣嘢,反而會反彈得仲快,因為你之後狂食返鍾意嘅嘢會仲唔好。」相信大家身邊都有唔少朋友幾乎日日都講話要減肥,方法仲層出不窮,Kelly都話以前自己都係咁,「一路都試過唔同on diet嘅方法,但我最後發覺鍾意食咩就食咩係最好,雖然咁樣可能唔係最佳效果,但要記住係適可而止咁食,等自己開心啲,唔會太大壓力。」咁連女明星最避忌嘅熱氣嘢都照食?Kelly就話,「我自己最鍾意食漢堡包同薯條,無話特別戒口,食完自己會開心咪得。」

睇到張曦雯咁relax,個畫面好治癒。
Kelly透露爸爸係一位超級健康嘅人,仲大爆daddy有6嚿腹肌。

但最估唔到嘅係原來女神張曦雯都試過體重高達150磅,「嗰陣我16,7歲都係肥妹仔,雖然我高,望落去就好大隻。」咁點解之後會的起心肝減肥?她笑言,「因為我家人見我越來越過分(體重),所以就命令我去減。」減肥中一定會遇到嘅問題就係減到一定程度,就好難再減到落去,Kelly話當年都係咁,「有一排瘦左,但之後又肥返,反復咁出現。但後來搵到啱自己嘅方法,就係之前講嘅鍾意食咩就食咩,就一直keep到而家。」她其後亦表示爸爸係超級健康嘅人,「佢而家雖然50歲,日日都去做運動,都有6嚿腹肌。」連爸爸身材都咁好,唔怪得知Kelly而家可以有女神稱號喇!!

Kelly指現時體重120磅,腰圍就有23吋,但留意返她身高有175cm,其實真係超級fit,佢就話平時唔會特別磅重,「生活都係開心姐,磅多兩磅又唔開心,我覺得咁就唔係幾好。平時著開嘅衫仲著到,望落去又ok就可以。」

+6
相信唔少女仔都好想有好似kelly咁好嘅身材!!

提到今次Kelly就疑似有艷遇,就是節目中有位身高190cm嘅外籍男士陪玩,Kelly透露對方有同自己交換Facebook,「其實交換完之後都無咩聯絡,咪當多咗一位毛里裘斯嘅朋友,如果可以有機會再見佢,都可以搵下佢。」講到Kelly間中都有緋聞,但一一都被她否認,問到係咪對男友有好高要求?Kelly就話,「無特別話要咩膚色,種族嘅人,香港人都OK,最重要溝通到,要睇下嗰個人係點,唔係對香港男仔抗拒。」

最後Kelly都透露今次全新一輯《3日2夜》播完之後都會繼續開拍,仲話一定要參與,「我最想去加勒比海嘅小島,最好就係有架郵輪載我地去每一個島,因為嗰度真係好靚,同埋可以潛水。」