【爸爸去哪兒】陳小春唔識湊仔　應采兒擔心：佢湊仔少過6個鐘

內地綜藝節目《爸爸去哪兒》打破禁播令，今日正式播出，不過湖南衛視都想試下水溫，所以率先播個先導片，氹下觀眾之餘，又可以睇下廣電局反應。不過等咗新一季咁耐的觀眾們，管他是先導片還是正片，全部欣然接受，睇咗先算。

今季《爸爸去哪兒》的嘉賓陣容由陳小春和兒子Jasper、吳尊和女兒Nei Nei兒子MAX、劉畊宏和女兒泡芙、杜江和兒子嗯哼，以及實習奶爸鄧倫和女兒小山竹５對父子父女組成。香港觀眾最熟悉的當然是陳小春，今集節目一開始， Jasper帶着一個巴斯光年面具開門迎接節目組。

看到Jasper扮作巴斯光年，節目組打趣問：「你是Jasper的朋友嗎？」Jasper好得意咁話：「係，但Jasper唔係度。」節目組就問：「咁我可以入來玩嗎？」Jasper就好驚被節目組知道自己扮緊巴斯光年咁，即刻閂門除下面具，做返Jasper開門。成個過程超得意，連應采兒見到個仔一人分飾兩角都唔識反應，在這方面Jasper都有幾分似老豆小春玩玩下的性格。

既然是參加《爸爸去哪兒》，當然是父親帶着兒子到外地遊玩，但應采兒超級唔放心，就提Jasper：「出去玩要小心，唔係一陣會跌親就會受傷。」啱啱講完，Jasper竟然即刻踩住滑板車扮演跌親的情況，見到囝囝咁唔怕死，夫妻二人都反晒白眼！之後應采兒就話：「希望節目組唔好俾父子二人太多獨處的時間，因為陳小春獨自湊仔的經驗少過6個鐘，如果要列出兩人出事的要點，恐怕超過100條。」聽到應采兒咁講，陳小春仍然自信滿滿，話：「OK的，沒問題，我唔怕自己湊唔掂一個細路。」

不過節目組似乎唔多俾面，剪輯咗一段陳小春父子相處實錄，大大力指證陳小春唔太多識湊仔：就如食飯的時候，陳小春就好似追女仔咁，夾嚿菜去Jasper口度引誘佢，但菜放到他的口前，又自己食返，認真搞笑。而平時陳小春就呼呼喝喝Jasper做嘢，最終Jasper嬲豬用英文話：「Can you stop angering？」陳小春才放下架子，觀眾見到二人的互動咁大火花，非常期望兩人在第一集的表現。