【反黑】招積復出報復火屎酷刑縫嘴 吳毅將：冇機會爆佢響口！
《反黑》播到呢刻，劇中社團和興盛可謂搞到四分五裂，黑仔（柯有倫飾）做辦事人做唔掂，神爺（陳惠敏飾）又似乎唔想讓位，搞到個字頭立立亂。不過呢啲都只係過場，真正戲肉今晚先開始。大家仲記唔記得有兩位叔父入獄後仲未出返嚟，就係韓彬（吳岱融飾）同火屎哥（吳毅將飾），二人將會聯手夾擊高調回歸嘅招積（張建聲飾），腥風血雨不在講，其中火屎更會因此犧牲，被挖眼縫嘴慘死，招積為乜出手咁重？《香港01》有幸得到江湖猛人火屎哥關照，率先為我哋披露少少結局篇劇情。（小心！內含劇透！）
出獄後逼神爺找數
最近一星期的《反黑》，主力講和興盛同洪樂之爭，不過好快主線又會返到和興盛爭坐館一事上，事關彬少同火屎將會今晚（第18集）相繼出冊。回番少少帶，第一集（1986年）講到彬少同火屎在社團會議上，因藏械同襲警入獄，火屎講明受完呢10年，出返嚟要畀佢做坐館作補償，當時彬少已點醒佢︰「辦事人？三五七年後都唔知咩世界啦！」事隔10年，兩位終於出獄，並準備搵神爺找數，但老人家似乎真係想賴帳，要起用新人。兩個有感被騙，在敵人的敵人就係朋友立場下，韓彬同火屎再不咬弦都一於冰釋前嫌，合組新勢力去打呢場社團內戰！
不過呢場內戰其實係三分天下，事關避走一段日子的招積都開心返埋嚟，又係想做坐館。表面上看似爭權，其實當中又夾雜私怨。事關招積當日同韓彬、火屎一齊落網，招積入獄兩年間與火屎同倉，火屎話佢好跟唔跟，跟個無間道鳳凰仔（陳小春飾）做大佬，於是在獄中糟躓佢，日打夜打之外仲搵人雞姦佢。這一點正好解釋番招仔點解出獄後性情大變，又點解會咁憎鳳凰。
吳毅將︰佢要挖我隻眼睇清自己！
此外，吳毅將率先為《01娛樂》公開好幾張拍《反黑》時的特技化妝相，相中可見將哥被挖眼又縫口，死狀甚恐怖，為咩死得咁慘呀？原來都係招積做的好事。吳毅將說︰「劇情講當我知佢又話要爭做坐館時，於是就搵佢出嚟傾偈，恐嚇佢如果再爭落去，就會爆佢在獄中被人雞姦嘅事出嚟，到時睇佢仲有冇面做坐館？」
點知呢句說話觸痛到招積神經，不單落手要佢命，仲要挖眼兼縫實佢把嘴。吳毅將說︰「呢兩點都有意思，縫實我個口代表我呢世都再冇機會爆佢響口，冇人再知佢被雞姦嘅事，至於挖眼就係我臨死時，佢挖我隻眼出嚟，要我睇清楚自己而家有幾折墮。」提及特技化妝，將哥非常滿意，化完都忍唔住不停Selfie。「化咗兩個鐘左右，台前幕後都好有心機，好逼真呀！」不少網民第一集見到火屎哥出場都好興奮，奈何之後就遲遲未見人，今次又同大家披露啲死人照，會唔會代表佢一出獄，就被人埋單先？「唔會，我總共拍咗8集戲，所以出獄後都仲有7集睇，慢慢睇！」將哥得知大家喜歡火屎呢個角色，都好開心。「多謝大家支持，我都希望將來有機會，拍多啲香港劇集俾大家睇。」