【演員的誕生】章子怡錄影同劉燁反面拍檯掟鞋 鄭爽嚇到眼紅紅

撰文:洪曉璇
出版:更新:

內地尊稱入行多年嘅藝人做「老師」,影帝影后級嘅劉燁同章子怡當然受之無愧。最近佢哋一齊為內地綜藝節目《演員的誕生》擔任評審,一眾年青演員喺節目中重演經典劇目,最終勝出嘅仲可以得到一線導演新戲演合約一份。喺最新一集中,內地演員鄭爽與任嘉倫表演後,兩位評審意見不合居然當場嘈起嚟,章子怡更翻臉將劉燁嘅鞋掟出去,全場惻目嚇到唔敢出聲。

章子怡同劉燁於節目中直接摃上。(影片截圖)
鄭爽與任嘉倫挑戰章子怡嘅成名作《我的父親母親》。(影片截圖)

鄭爽與任嘉倫於節目中第一組上場表演,劇目正好就係章子怡嘅成名作《我的父親母親》,當年佢只得19歲,演技令人驚艷,亦令佢奪得百花獎最佳女演員獎。事隔17年,在《演員的誕生》中由鄭爽再次詮釋這個經典角色。獲得章子怡的稱讚:「如果19歲的章子怡站在這個舞台上,我一定不如她(指鄭爽)。」

19歲嘅章子怡演技令人驚艷。(影片截圖)

不過好戲在後頭,評審要求鄭爽同任嘉倫再來段即興表演,劉燁一句「很滿意」引來章子怡一句:「他們一點信念感都沒有,你滿意什麼﹗」嚇到台上嘅鄭爽即時收起笑容,章子怡同劉燁之間嘅爭執愈趨激烈,劉燁拎住手機拍檯直斥章子怡係針對鄭爽,更現場脫鞋拍檯力撐鄭爽,點知俾章子怡一個反手掟出去。眼見情況一發不可收拾之際,章子怡笑住同劉燁抱抱,大家先知道原來佢地做緊即席示範,如何一秒入戲「殿堂級的吵架」。影帝影后之名果然唔係浪得虛名,一氣呵成更被網友力讚「毫無表演痕跡」,仲衝上熱搜榜首位添。

呢段「殿堂級的吵架」嚇壞唔少人。(影片截圖)
+14