【集體回憶】《鬥魚》開拍電影版 郭品超安以軒藍正龍會否歸位？
撰文：洪曉璇
出版：更新：
時下年輕人大多追棒韓劇韓星，其實二千年代香港係吹台風，睇台劇追星唱K都係唱台灣歌手作品，其中一套爆紅作品就係2004年嘅《鬥魚》，由郭品超、安以軒、藍正龍主演，被譽為「台灣版古惑仔」，片尾曲《Lydia》更令F.I.R.未出道先轟動，事隔近14年最近傳出將會開拍電影版，令網友高呼童年回憶返晒嚟呀。
《鬥魚》令郭品超安以軒藍正龍穩坐一線演員之位。(劇照)
安以軒經紀人回覆查詢時就話仲未收到開拍《鬥魚》電影版消息。(視覺中國)
《鬥魚》改編自網路作家洛心作品《小雛菊》，劇集播出後大受歡迎，連帶安以軒、郭品超、藍正龍等就攀上電視圈一線之位，今年8月原作者洛心受訪時曾提及《小雛菊》將拍電影版，呢日《鬥魚》製作人柯宜勤，亦向媒體承認，電影版劇本已接近完成：「劇本已做2、3年，完成度約8成。」網友最在意裴語燕單立傑，係咪會搵番安以軒同藍正龍飾演呢，佢就話會徵選新演員，亦希望原班人馬可以參與，目前劇本調整中，等到落實晒先再傾演員選角。安以軒經紀人回覆查詢時就話仲未收到消息。
翻拍經典作，觀眾最期望能原班人馬參演。(視覺中國)
事隔近14載，藍正龍安以軒均已成家立室。(視覺中國)
古惑仔愛上乖乖女，轟轟烈烈嘅愛情最吸引年輕觀眾。(劇照)
電影講述郭品超飾演嘅古惑仔于皓，同乖乖女安以軒互相愛慕，上演一段轟轟烈烈愛情，同好兄弟藍正龍張勛傑鐵角闖江湖，就好似香港嘅陳浩南山雞一樣，《鬥魚》同年第二輯仲有小豬羅志祥加入。不過影響最深遠嘅，應該係F.I.R.飛兒樂團演唱嘅的主題曲《Lydia》，令當年尚未出道嘅F.I.R.一炮而紅，至今仍然係粉絲心中經典神曲。可惜最近傳出主唱飛同建寧老師之間出現糾紛，電影版想聽到佢地再主唱機會應該微啲啦。
+6