【收視分析師】《 降魔的》正式成為神劇 大結局收視跌又如何?

撰文:溫菁莉
出版:更新:

歡迎收睇逢星期三嘅《收視分析師》,上週劇集《降魔的》仍是市場的焦點,昨晚收視業績亦全面做好,平日平均收視報25.2點,照計大結局應該仲好啲㗎?加上尾二嗰集又冇爛尾,點知得24.9點,呢個係綜合收視,已計埋手機及其他平台的收視,點解大家結局收視反而低咗呢?最大原因係隔一日先播,呢下真係累死《降魔的》!

如果TVB頒獎禮有開設《年度神劇》獎項,劇集《降魔的》無誤!
星期日先播大結局其實對《降魔的》好蝕。

隔日播大結局 流失觀眾

點解隔一日對劇集播好蝕?以今年6月逢播出的《踩過界》為例,原本只放在週末播出,而最終大結局破天荒安排在星期四至日連續播出,最後收視仲去到27點,所以咪好成功令全城觀眾陷入煲劇模式,亦證明今次TVB宣傳策略好式。照計應該copy自己成功方程式㗎?世事就係咁難料,《降魔的》真係命苦,TVB竟然打窒佢到氣....

 

佢地3位係今次《降魔的》演技同樣被觀眾贊同。

將大結局隔一日,星期日(26日)先播,因為星期六(25日)要播馬來西亞星光薈萃頒獎典禮,根據觀眾睇電視嘅習慣,你星期五睇完《降魔的》最後一下高潮位,超期待大結局,成個fb,討論區、WhatsApp群組,講緊大結局點?有冇season 2,吹奏緊馬明視帝,完全進入降魔mode,你走嚟斷我條氣?要我隔一日?嘩!真係好嬲喎,即係連買5鋪大都中,第六鋪諗住重鎚都係大,因為偷睇到兩粒骰都係六,都知一定中,但同你講唔俾買,要你隔一鋪先俾買,你話扯唔扯火?

《踩過界》原本只在星期六、日播放,但最後四集連續播放,令大結局收視爆升。

希望TVB下次唔好咁樣安排,尤其當全城都講緊你套劇嘅時候,而家唔係7、80年代,觀眾會撲返屋企睇電視,大家娛樂選擇多咗,隔一日,就過咗淡氣,難得今次《降魔的》咁成功,連嗰班話唔睇TVB嘅都有捧場,好心就配合下啦,你播完個頒獎禮,再播大結局都好啦。

馬明最大心願是《降魔的》攞〈最佳劇集〉,希望大家集氣幫幫佢啦。

雖然大結局收視不似預期,不過只是數字上美中不足,《降魔的》已是本年度神劇,下年頒獎禮有沒有獎?老實講,多數冇,因為無綫特登將頒獎禮放喺下年1月21日舉辦,食正《溏心風暴3》大結局後兩日,動機呼之欲出,但唔緊要,獎座喺大家心目中已頒咗,馬明就算攞唔攞到視帝都唔緊要,一個演員最重要是有代表作,仲要喺令人一世記得嘅作品,5年後或者10年後甚至更耐都有人記得《降魔的》,會記得小馬、龍貓、啤啤、些粉、力哥、加嫂....呢班曾經令你好感動嘅角色。

睇《溏心風暴3》,當然要睇佢地成家人食飯喇!(錯重點)!

《誇世代》分分鐘有反身機會

至於現在才播到17集的《誇世代》,雖然收視敵不過《降魔的》,上週平均報24點,相隔一個星期僅僅上升一點。但今個星期開始睇怕有勁敵了,因為日前播出《溏心風暴3》,對於呢套已有10年歷史嘅「老字號」劇集,雖然今次都係同頭兩輯一樣講「爭產」,只不過爭嘅唔再係爭鮑魚同月餅,而係爭奶茶,題材方的確係悶咗少少,但起碼有班師奶like先,仲要有不少老戲骨演員好似夏雨、李司棋、米雪同菊姐坐陣,對於die-hard觀眾層來說「點都會睇」!究竟創新台慶劇《誇世代》同師奶劇《溏心風暴3》最終效果會係點?至少要一個月先知,唯有同《誇世代》講句,你要俾啲心機喇,話唔定有反身機會!