如果平日放假留在家中無事做，識揀一定會打開電視睇《都市閒情》，點解？因為有靚女主持彭慧中著住短裙同你講日常生活事！而且自她2015年起加入《都市閒情》，成為了網民心目中的女神，不過同時都覺得佢好似有點低調，因為想見女神僅限於一點二十五分至兩點零一分！彭慧中聽到都坦白咁講：「我有好努力咁爭取過㗎喇！」

彭慧中自2010年選完港姐加入TVB，她笑言這過程都是誤打誤撞，其後工作主要是主持，直到《都市閒情》就開始得到網民注意。可是短短三十五分鍾的曝光時間又怎麼會夠？彭慧中都話好想拍多啲劇，都有去爭取過：「我都有去努力爭取㗎！不過可能我份人比較慢熱，未入行之前份人已經唔係咁sociable，可能要再畀啲時間。」彭慧中坦言入行7年，雖然生活上沒有太大問題，但都想多啲工作：「好多人都以為我好似無憂無慮咁，但其實唔係㗎！」不過她後來認為，還是要隨遇而安去面對：「我等梗㗎喇！我將來應該會有機會㗎喇⋯只要網民再支持我多啲嘅話。」彭慧中不甘心只做《都市閒情》，但如果繼續等下去，可能係五年、十年，咁仲等唔等落去？她聽後遲疑了幾秒再說：「唔知呀⋯機會要嚟就會嚟。」

女神的潛力除了被低估之後，感情世界都一樣被低估。彭慧中身型嬌滴滴，又有好身材，應該都會拍緊拖，或者有好多人追，但她斬釘截鐵地說：「冇呀！唔覺有人追我喎！」不過可能係彭慧中對拍拖都有啲要求：「咁都要睇定啲嘅，唔可以亂咁嚟。」彭慧中最想男朋友有安全感：「呢樣係最重要㗎，要多啲關心我同緊張我。」聽落好似好易，尤其女朋友是彭慧中的話，日日關心都得喇。