【TVB頒獎禮】田蕊妮喊住撐何遠東 讚龍貓好努力：真係好想佢攞
撰文：郭敏玲
出版：更新：
阿田覺得《迷》計穎妍好難做。(陳順禎攝)
田蕊妮的演技出名好，今次再下一城憑《迷》被提名「最佳女主角」。阿田笑言要揀女主角，會不客氣地揀自己：「我睇好我自己！就算有鮑姐我都係睇好我自己。」因為阿田在《迷》一角飾演媽媽，她曾透露演出時會憶起已逝去母親，對她來說並不容易：「《迷》呢個角色對我嚟講，係一個經歷，對我嚟講都係難嘅。我都好似咁對我自己，我並唔係囂，但老實講我睇完之後，我都心入面同自己講，阿田叻！真係叻女！嗰幾個月終於捱過咗，出到嚟又唔係好失禮，我自己又滿意。」阿田睇好自己，並不是要拎獎，而想對自己有個信心肯定。
阿田話睇好何遠東，說時更忍唔住喊。(陳順禎攝)
提到揀邊個做男配角，阿田就提起何遠東：「啱啱撞到阿東，佢就同我講佢終於有份提名男配，我嗰下真係好感動。」這個時候，阿田已經在哽咽，再慢慢解釋：「唔知點解佢提名我好感動。因為佢係《巨輪一》做我細佬，我覺得佢做得好好，係一個好努力嘅演員，而過往嘅頒獎典禮入面，都唔會有佢個名出現，佢唔應該被忽略，所以今次可以有提名，我真係好感動。坤哥就等多幾年先，私人感情我會揀阿東，唔知到時攞獎會唔會喊得勁過佢呢，但我真係好想佢攞。」