【降魔的番外篇】馬明終於出場捉妖 下周變陣谷點擊
撰文：鄺鈺瑩
出版：更新：
馬明一出場：「我今日收你皮」型到無朋友。
《降魔的番外篇-首部曲》每個星期一口氣連播四集，上星期先係講楊潮凱飾演嘅左治點解會變成的士司機，繼而重遇黃建東飾演嘅中學同學古尼，並得到「能量偵查器」開始捉妖。
楊潮凱一見到鄧佩儀即時心動，到底可唔可以打破人同魔唔會有好結果呢個定律呢？
之前一直話馬國明有份客串《番外篇》，等了又等，馬季終於喺第六集以的士降魔師身份，駕著紅色的的士現身，並協助楊潮凱捉捕雪狐妖，由落車到追捕都型到無得輸，而佢最後留下一句「後患無窮」更係一大伏筆。與此同時，鄧佩儀飾演嘅神秘女子亦都登場，一把金色長髮加上白色短裙，難怪楊潮凱會對佢心動，最後更索性帶埋佢返歸，為佢改名之餘，更與黃建東成立「降魔的士事務所」。
《番外篇》下星期每一日集，觀眾可以快啲見到張曦雯呢位大妖女。
《番外篇》係大台首次推出嘅網劇，見佢之前特地舉行首映就知有幾重視，首集有6萬幾點擊率，比起《DO姐再shopping》分半鐘花絮都有8萬幾點擊雖然係有差距，但都叫不過不失啦。而為催谷收視，原定逄星期五播出四集的模式，亦將會改為一日一集，亦由星期一起實行，15號將會播出最後一集。據知，有此改動，除為測試不同的播放模式之外，最主要係想大魔女張曦雯早啲同大家見面。