【3日2夜】被指聲線表情太誇張 李旻芳:其實都算進步咗

撰文:郭敏玲
出版:更新:

自從TVB頒布了「禁色令」之後,J2節目《三日兩夜》進行了深層清潔,著名的泳衣、浸溫泉場面都大幅減少。不過,節目如何被淨化,都會有一班固有觀眾,因為靚女才是最大的賣點。昨晚的《三》有李旻芳(Lucy)做主持,她就帶大家到日本千葉縣,吃了多款當地名物,可是有網民看完就覺得Lucy品嚐食物表情太誇張,聲線有點偏高,似乎是多集《三日兩夜》裡面,最多負評的女主持。

有網民就覺得lucy好似誇張咗。

事後都有網民在她的Facebook專頁留言:「你在三日兩夜中説話聲調很誇張。」Lucy其後回覆留言:「 謝謝你的提醒! 我也在努力學習當中!希望每次出鏡都要有進步。」《香港01》亦有訪問Lucy,她笑言:「啲嘢食真係超好食㗎!日本冇嘢唔好食!」後來她再透露今集是她第一次自己一個主持旅遊節目,所以有點緊張,但表現比之前有所進步。她看過節目之後,解釋自己比較誇張的原因:「睇完其實覺得自己都算進步咗,因為平時自己做開《東張西望》主持,以時事議題居多⋯⋯所以比人感覺會較斯文同文靜。

而今次自己主持旅遊節目想呈現活潑開朗嘅一面比觀眾睇,想做返真正嘅自己去拍攝旅遊節目~可能因為太興奮,同埋其實自己係一個超級宅女⋯⋯所以有好多野都係第一次試同第一次見嘅時候,就會好興奮⋯⋯拍攝時候忘咗形,無注意到自己表達嘅聲線同表情,搞到好似反應好大咁!其實自己睇返都覺得有改善嘅空間。」

Lucy浸溫泉的畫面亦cut了很多。

Lucy聽到網民的意見表示沒有不快:「我好樂意接受任何意見,始終自己演繹係好主觀,一定要接受意見先可以有進步。我嘅目標係做出色嘅主持同司儀,我知道自己仲有段好長嘅路要行,沿路一定要虛心學習先可以成功。就算有一千個人讚,一個人彈,都係有改善嘅空間,咁先可以做到最好。所以我一啲都唔介意,反而好多謝佢哋。好開心有留意到我,咁我先知自己做得好唔好!」其實今次Lucy出發前做足功課,亦參考了其他節目主持的做法,希望觀眾可以看到她努力的一面,從而找到自己的定位。看過今集《三日兩夜》之後,雖然Lucy有些表情是比較誇張,可是感受到她是出自真心,一來日本真係無嘢唔好食,二來食到好嘢有這個反應其實唔出奇!

好似真係好好味。
+8

另一方面,「禁色令」之後,Lucy在《三日兩夜》浸溫泉畫面大量被剪走,她感到可惜:「其實去嘅溫泉地方都唔係普遍香港人去開嘅。專程去咗幾個唔同而又好地道嘅地方介紹溫泉, 環境清幽舒服又好Relax,拍出嚟其實都好靚,所以cut 淨好少都有啲可惜。」

+4