陳偉霆新歡舊愛同台跨年　意外成觀眾最想睇場面

一年容易又一年，不用一星期時間就踏入2018年，接近年末內地不少電視台亦開始陸續宣布跨年演唱會的節目，其中最令大家關注的就當然是有咩重量級藝人表演啦，睇了幾間衛視節目表，浙江衛視都可以話是今年數一數二比較有睇頭的電視台：Twins、林俊杰、蔡依琳……邀請了不少中、港、台天王天后天團助陣，足足有28組藝人朋友。不過網友卻發現最大亮點竟然是陳偉霆將會同舊愛楊穎（Angelababy）、蔡卓妍（阿Sa）以及緋聞女友迪麗熱巴同台，意外成為大家最想睇的表演之一。

從浙江衛視官方微博宣布可得知，2018跨年演唱會有28組超過40位藝人朋友參加，S.H.E、Twins、鄧紫棋（G.E.M.）、張靚穎、林俊杰、蔡依林等等，星光熠熠的明星組合令人十分期待。不過最令網友感到意外的是陳偉霆亦是今次表演嘉賓，將會有機會同舊愛Angelababy、阿Sa，以及緋聞女友迪麗熱巴同台。雖然未知大家會表演甚麼節目，甚至於不知道會不會合作演出，不過在同一個場合不多不少都會見到，甚至於在最後一刻同台迎接新一年到來，正正因為新歡舊愛同台，不少網友都話當場氣氛應該會好尷尬，更表明成個演唱會最期待他們出現，絕對是一大亮點。

Angelababy同陳偉霆曾戀愛超過4年時間，二人更有一個愛的紋身，不過最終因為聚少離多以及壓力關係，二人於2009年分手。2010年陳偉霆同同門師姊蔡卓妍展開戀情，一開始女尊男卑的關係未受外界睇好，直到男方在2014年演出《古劍奇譚》大師兄陵越一角而大受歡迎，從而人氣反蓋過蔡卓妍，加上工作忙又聚少離多，最終在2015年共同發出聲明宣布分手。再來緋聞女友迪麗熱巴，因為男方在生日當日開演唱會，她坐在第一排欣賞，仲被男方的一番說話感動到喊，而且她又不時身穿男方設計的同款衣服與帽出現，許多證據被外界傳在一起。

一場跨年演唱會就把陳偉霆的愛情蜘蛛網連結在一起，肯定成為最觸目的演出，我們就拭目以待喇！