《到此一遊》林師傑同黃心穎拍親熱鏡頭超緊張：招架唔住！

無綫劇集《降魔的》大受歡迎，由胡鴻鈞主唱的主題曲《到此一遊》亦唱到街知巷聞，TVB即刻食住個勢，推出了由馮盈盈、黃心穎、蔡思貝、張寶兒以及邵珮詩合唱的小花Version，日前於官方facebook發布之後，獲得網民熱烈的反應。MV的主角當然是5個靚女啦，不過其實仲有兩位男藝人有份演出，就是周志康同林師傑喇。

兩人都分別分飾了兩角，一是負責扮喪屍，成個樣都被特技化妝遮晒，根本看不到他們是邊個。另外個角色就可以用返自己個靚仔樣示人，周志康出鏡的次數都幾多㗎，可以清楚睇到是他。反觀林師傑飾演的型仔紋身師就完全見不到樣，就算半裸爆肌上陣，都只係見到他的手臂同背脊，唔講真係唔會知是他囉。

有網民就覺得林師傑今次在MV入面零存在感，仲慘過坤哥做棋，好戥他唔抵呀！香港01記者就訪問了師傑，問問他到底有無因此而唔開心，他說：「唔會唔開心，公司有大project自己都好想參與，我好雀躍一口答應㗎。入行咁耐都未有機會試特技化妝，化咗4個鐘，其實唔算辛苦，因為jacky（化妝）團隊好照顧我哋，每個step講得好清楚，幾時噴眼，口，鼻都會先通知先噴，好體貼。收工仲特意留多一個鐘幫我哋落妝，硬性要我地敷咗mask先俾上車。」

化妝化成4個鐘都咪話唔辛苦，不過師傑覺得辛苦之處是拍攝當日得13度，而他要半裸坐足4個鐘：「辛苦係辛苦在於當日好凍，真係要赤膊坐係度4個鐘，得閒又要噴啲液體上身。同埋周志康之前有工作，佢嚟到先食飯，我仲要等埋佢食完，所以我上妝時間多過佢兩個鐘。」首次扮喪屍的他仲好開心添：「戴住個面具感覺好free，同埋第一次用肢體去演繹一堆嘢。其實我哋拍多咗好多嘢，喺背後，無剪到出嚟嘅。但係可以做喪屍準備去殺人感覺好正，真係試咗一樣好唔同嘅東西，成個過程好開心。」

而勢估不到，成個拍攝過程令師傑覺得最辛苦，竟然是要同心穎拍的親熱鏡頭：「因為原來我無拍過好多親密戲份，嗰晚我同心穎拍咗個幾鐘，唔係好耐，不過我真係未試過拍幾個Shot拍到咁攰，超緊張，個心跳得好快，跳到個人覺得有啲唔舒服。嗰晚咁啱我撞咗工作，係做做下嘢特登衝過去拍一陣，趕到都無時間食飯，咁心穎咁性感咁靚，唔食飽飯無可能招架得住㗎嘛，所以嗰晚拍到好攰。」