【誇世代】結局篇由膠劇變神劇　陳豪：未試過大結局變得咁緊要

睇睇下，《誇世代》今個星期就已經去到大結局。劇情初頭都正正常常，講述宋仲基（歐陽震華飾）與包豹（吳業坤飾）對調靈魂之後發生的事，劇情中間亦穿插了不少「抽水」橋段。雖則話劇情比起同期播出的爭產劇創新，但網民仍然嫌棄《誇世代》「膠味」太濃。

【誇世代】七小姐終可同Walking一齊？　身份三重變最後竟然……
【誇世代】劇情大暴走變打喪屍　陳豪做宇宙大王係咩玩法？

不過由踏入結局篇的這個星期開始，劇情就開始180度大兜亂，又坐時空的士到未來，又話蝴蝶效應，就連walking dead都出埋，真係似十足網絡原創故事咁，更有網民留言話有屋企人睇到精神分裂添。隨著劇情扭轉，網民態度亦都跟住轉變180度，更大讚劇情出色有創意，由膠劇昇華到神劇咁話。

陳豪（Mike）今日出席活動接受《香港01》訪問，他就回應了不少網上的提問。其中他特別講到，原來唔止係網民，就連他本人也十分喜愛《誇世代》的大結局。「其實係今次佢創作大膽。好坦白講，我拍好多電視劇。我知道嘅，我會有好多爆肚，為咗喜劇效果更加好，言語上對白上會可以踩界。但係今次監製為咗保存個感覺，佢都放膽俾我哋去，所以我都幾surprise佢幾肯俾我哋創意。另外，其實佢哋都係行緊呢個方向，你睇套劇其實都係天馬行空。我諗我拍咁耐劇，未試過個大結局可以變到咁緊要。所以套劇可以跳開咗個框框，我係欣賞嘅。」

對於這個跳線又離奇的結局篇，李佳芯（Paris）接受《香港01》訪問就說：「本身每條線都要講其實已經好難，但係佢可以將成套劇，每條線都有自己故事，又講得咁好。當初睇嘅時候我都估唔到，有好多我冇諗過嘅劇情佢都放咗喺結局度。我相信呢個都係我個角色Paris嘅一個surprice。」

陳豪：「我相信每個演員收到呢個劇本，尤其是大結局，大家都會幾愕然。『吓，跳到咁樣嘅？變到咁樣嘅？』雖然大家會有啲疑問，有啲質疑，但係大家依然緊守崗位。我哋反而會覺得，既然要嘗試，why not？咪大家一齊去試一齊去闖啲嘢出嚟囉。其實有時下下固步自封，出嚟嘅嘢雖然會比較實淨，但係就會冇咗衝擊。我覺得做演員或者做咩都好，就係要抱住個膽識，去嘗試，行出一步得一步，慢慢去摸下個底線，其實觀眾接受嘅嘢可以好大。」