【渣打馬拉松．多圖】蔡思貝半馬勁快跑完：比目標時間快咗2分鐘
撰文：洪曉璇 林迅景
出版：更新：
渣打馬拉松2018今日（1月21日）舉行，TVB不少藝員都有參加，其中出名耐力好的蔡思貝今次就跑半馬，而且不用2小時就完成，成績好過好多跑手！
滿頭大汗的蔡思貝，完成賽事後蔡思貝接受訪問時，都顯得相當滿意。(梁碧玲攝)
馬拉松係好講求耐力及意志力嘅賽事， TVB女鐵人蔡思貝（Sisley）挑戰「渣打馬拉松2018」半馬賽事，成績相當唔錯，做出1小時47分55秒，比起賽前目標時間仲要快咗兩分鐘。Sisley賽後接受《香港01》訪問就透露中途都跑到想喊，不過有呢個成績相當開心，但當然並唔會自滿：「細個跑21公里1小時44分，依家都慢咗3分鐘，希望追番細個青年組時間。」
【渣馬2018】蔡思貝挑戰兩粒鐘跑完半馬 女鐵人再直踩台慶頒獎禮【後生仔傾吓偈】蔡思貝長跑真係好勁 余德丞：我無氣佢都未停
原來蔡思貝已經跟吳師傅練跑十幾年，呢次拍住上成功挑戰半馬，至於之後會唔會試下挑戰全馬，就要睇下有無時間訓練啦。(梁碧玲攝)
香港嘅渣馬出名難，更加可以話係暗藏殺機，除咗潮濕天氣容易令選手不適，更甚者係有好多暗斜路段。Sisley訪問時都話中段跑到叫救命：「最辛苦係跑到西隧嗰段，暗斜跑落再上，跑完西隧以為完咗點知仲有條上斜，當時真係有喊嘅衝動，係師傅喺旁邊用慈父Tone支持我，話我好叻女，當時好感動，同自己講一定要完成佢。」
香港馬拉松賽事出名好難，完成賽事一刻蔡思貝都不禁露出辛苦表情。(梁碧玲攝)
成功挑戰自己，應該開懷大食再快啲返屋企補眠，不過Sisley就話自己真係無得抖，事關今晚就係台慶頒獎禮啦：「尋晚瞓唔著，一日內有兩單大事發生，依家可以鬆一半口氣，因為完成到賽事我仲企到喺度，我都擔心過完成唔到架。不過做完訪問都無得返屋企，因為腰有舊患我要去做物理治療， 今日唔做之後去12日緬甸無時間，要去急救咗先再趕去頒獎禮，如果等陣頒獎典禮見到我恰眼瞓唔好話我呀…哈哈。」
+11
蔡思貝完成賽事後，就要趕去做物理治療，然後裝身出席台慶頒獎禮。（梁碧玲攝）