【掟狗落街】刑罰要同謀殺睇齊? 宣萱支持重判:動物都係生命

撰文:陳栢宇
出版:更新:

宣萱(Jessica)愛狗愛到出哂名,之前喺訪問憶述返自己其中一隻愛犬離世嘅過程時都顯得非常感概。對於近日一名23歲嘅男主人喺深水埗掟自己隻白色銀狐犬落街分屍嘅案件,Jessica亦都係感受好深,佢今日出席活動時就向《香港01》表示:「我唔敢睇,都係人哋講畀我聽,我哋可以做嘅就係參與多啲活動宣揚多啲正面訊息,等香港個氣氛好啲,可能係因為香港環境比較細、生活壓力比較大,令大家負面情緒比較多,引致好多呢啲悲情發生。如果佢係好人好者,佢絕對唔會掉自己隻狗落街。有情緒係應該用其他方面處理,唔應該傷害手無寸鐵嘅人、動物。」

對於近日發生嘅深水埗掟狗落街分屍嘅案件,宣萱都感受好深。(黃國立攝)

Jessica喺訪問時亦表示自己認為「動物警察」應該早日成立,而其實社會各界亦慢慢正視愛護動物問題,好似依家多咗人養唐狗。至於殺狗殺貓係唔係應該提高刑罰,Jessica就咁講:「要視乎點解個人要做呢件事,其實應該同殺人嘅判決差唔多,因為始終都係生命,佢哋係唔識講嘢,但其實佢哋都係有感受,有人覺得動物好多,冇咗隻冇所謂,但其實人都好多。」殺人最高判終身監禁,殺狗係咪都應該咁?佢就咁睇嘅:「如果嗰個人係鍾意為其他人、動物帶來痛苦而做呢啲事,係真係要重判,但去到咩地步,就要慢慢商討。」

宣萱認為寵物都有生命,所以殺害動物應該與殺人一樣重判。(黃國立攝)
+8