【飛虎極戰】梁烈唯內地工作量大增 亦盼香港觀眾喜歡自己作品
撰文：梁子健
出版：更新：
在整個《降魔的捉妖遊戲》中，除了林盛斌，梁烈唯亦算是拍攝遊戲類節目的大前輩，經驗相當豐富，但想不到他竟說自己表現得最差：「其實今次喺呢個團隊入面呢，個個都好聰明，最蠢就一定係我，玩得最差就係我，因為我配合唔到佢哋個速度，當我仲諗緊點樣玩嘅時候，佢哋已經玩完喇，跟住話唯唯咁水皮嘅。」
估唔到咁多遊戲節目經驗的唯唯，竟是玩得最差的一個。（黃國立攝）
唯唯深怕《飛虎》中的造型嚇親女兒，每次回家都會先紮好頭髮，令自己看起來精神一點。（劇照）
玩遊戲水皮不緊要，最緊要是出來效果好、受歡迎。講起受歡迎，唯唯有份參演的劇集《飛虎之潛行極戰》的內地播放量以億計，且他飾演的奸角KENNY更令人印象深刻，有種既妖又邪的心寒感。對此，他坦言下了番功夫：
「其實拎到個角色時有少少無從入手，導演監製俾我嘅指引係個角色要成日笑嘅，咁我就諗點樣去笑先達到嗰種見到你笑但會心寒嘅FEEL呢? 當然自己有參考好多角色啦，一定有就係小丑、Johnny Depp嘅角色。」
另外，他亦感激勞苦巧高的製作團隊：「因為個造型、頭髮等等會令到個人好入戲，個髮型又一邊重啲一邊輕啲，搞到個人好自然企到側埋一邊，所以行路都痞下痞下咁。我都同個造型師講，如果無咗佢哋整呢個造型出嚟，KENNY呢個角色未必會係而家咁嘅樣，即係我演繹出嚟都唔會係咁，因為個造型都好影響演員嘅演出，所以KENNY嘅成功絕對係成個團隊努力嘅成果。」
最後，《飛虎》在內地大熱，當然令唯唯多了很多北上發展的機會。他說：「咁我當然係希望對我北上工作方面有幫助啦，搵我工作嘅人都應該多咗好多，但最後能唔能夠成事都要問返經理人。不過除咗內地，自己都好希望得到香港觀眾喜歡啦，因為我都好耐無劇出喇，大家都以為我無拍劇添，咁所以都希望大家都鍾意《飛虎》啦。」
唯唯指雖然多了北上工作機會，但都希望香港觀眾繼續支持自己。（黃國立攝）