【教育電視】王祖藍18年前演排球隊萬人迷:點估到自己做小生

撰文:陳栢宇
出版:更新:

最近香港電台就籌備緊拍攝一個節目,叫做《我們都是看ETV長大的》,仲喺facebook開咗個Page畀大家重溫部分教育電視嘅精彩片段,亦搞咗個「ETV一哥一姐」嘅票選,等大家揀出自己嘅心水。六位候選者依家喺娛樂圈都好活躍,一啲仲估唔到佢哋原來係有份拍教育電視添,就好似王祖藍同宇宙級歌手G.E.M.(鄧紫棋)咁。

香港電台依家籌備緊節目《我們都是看ETV長大的》,最近仲開Page叫網友票選「ETV一哥一姐」添。(影片畫面)

原來王祖藍喺2000年左右拍過幾集數學科同常識科嘅教育電視節目,當中仲包括以性教育為題材嘅《青春心曲》,而佢喺呢個故事裡面仲竟然係飾演一個充滿運動細胞嘅排球隊隊長,喺學校打親排球都有女仔忍唔住望。當然啦,佢唔止得呢招啦,以下呢招就真係精彩:佢準備上小巴時,就一手截住想打尖嘅男同學,等女主角可以順利跟隊上車,又畀埋對方份車錢,搞到個女主角成個樣春心盪漾咁。

王祖藍喺2000年播嘅《青春心曲》裡面飾演一個萬人迷運動男神,睇落仲有幾分似EXO個D.O.添。(影片畫面)

男神出招實錄:

+7

王祖藍接受《香港01》訪問時,就講返自己喺世紀初時參與教育電視嘅原因:「當年喺演藝學院成日都有呢類通告,嗰時我亦都喺香港電台做兒童節目,佢哋要啲字正腔圓、個樣好乖嘅人拍教育電視,所以就搵咗我喇。」點睇以前嘅演出?佢就覺得好搞笑:「最有趣係自己竟然做男主角,我點會估到自己係做到小生,仲要我喺青春心曲裡面係做排球隊隊長,你話驚唔驚。我係完全唔識打排球,亦都唔識運動,俾人愛慕嗰種感覺實在太好笑。」佢又笑指自己當年比起依家瘦幾個圈。

王祖藍話除咗搵佢做小生呢件事好搞笑,俾人愛慕嘅感覺又係好妙不可言。(網上圖片)

其實其他候選藝人都好值得講,就好似G.E.M咁,可能佢細細個時個樣同依家都有少少分別,但係佢個招牌金魚咀仲Keep住喺度,仲有佢細細個時啲普通話已經好犀利,唔怪得大個咗可以喺內地咁威咁勁,真係好似整定咁。林一峰、黃美棋、楊思琦個樣都同依家差唔多咁,都係咁靚仔靚女,不過最令人驚喜嘅都應該係以下呢個。

【教育電視】人氣女歌手廿年前拍過ETV 接近九成人估唔到她是誰

G.E.M.細個真係好得意,個咀仔同依家一樣!(影片畫面)
+3