無綫處境劇《開心速遞》昨晚播出的一集有個串星驚喜現身，唔知大家有無睇呢？所講的就是已經成21年無演出TVB劇集的古巨基喇。雖然最近他為了宣傳他在5月份的演唱會，經常公開露面，已經上了TVB的《流行經典50年》擔任客席嘉賓，又上《東張西望》做客席主持，今次就連劇集撈埋，令到觀眾同網民都覺得好驚喜呀。原來當日拍呢場戲時，劇中的一班演員事前並不知道基仔會出現，一見到他時真係開心又驚喜㗎。至於基仔個角色係咩？就係「星爺」周星馳都演過的外賣仔喇。

呢場戲講基仔飾演的外賣仔拎住兩大袋早餐送到熊家屋企，熊家一家在練武，基仔呢個多嘴的外賣仔就走入屋問人是否武術世家，又話自己對功夫都好有興趣，根叔（劉丹飾）於是叫基仔如果想跟他學武可以隨時找他，基仔就好開心咁拿着錢離開，臨走前仲話根叔畀多了錢給他。雖然今次基仔的對白得幾句，出場時間亦只得33秒，但已經輕易成為了成集的亮點，令大家留下深刻的印象，所以他演這個外賣仔演得好成功，演技無生疏㗎。有網民仲話如果個外賣仔唔係基仔，就唔會畀佢入屋又傾偈啦。今次基仔客串確係難得，唔知下次再喺TVB劇見到基仔係幾時喇？