【逆緣韓馬利】混血美女為老公下廚煲燶湯：早幾日差啲燒咗個廚房

《逆緣》中翁芷蘭（韓馬利Mary姐飾）一角，在與日籍丈夫庄司晉三（鈴木秀哉飾）離婚前，一直扮作入得廚房、打理家務頭頭是道的賢妻良母，實質是個性格自由奔放，喜愛周街逛周街玩的人。這一點，似乎與觀眾印象中的韓馬利相似，畢竟她演出的多是大剌剌、玩世不恭、嗶哩叭啦等角色，但她說現實中的自己其實是個不愛玩，而且很愛做家務的人，真的估她不到！

【煮餐飯燒咗個廚房係咩玩法?】

「我好鍾意做家務，有時清潔姐姐做完嘢，我都會再執吓手尾，因為我想個環境真係一塵不染、井井有條，所以我其實係個好死板嘅人，同翁芷蘭呢個係唔係都點個女（庄司晨、林夏薇飾）幫手做家務嘅角色唔同，我唔鍾意樣樣嘢都假手於人。」難怪Mary姐屋企那麼大都不請全職家傭，只請鐘點打掃，她更說自己會入廚煮兩味：「我唔叻煮飯，但我識煮，仲會去學，因為我覺得老公有時都想食一餐住家飯，所以佢食得開心我又會開心。」

不過，記得Mary姐好像試過把廚房燒了。「我先嗰幾日又差啲燒著！我煲熱咗個湯之後完全無印象走咗去瞓覺，瞓到半夜兩點幾鐘突然起身去廁所，然後先聞到燶燶地味。起初我以為出面有人燒嘢食，仲走出騎樓望下，點知經過廚房望到有啲火光，先至驚覺個煲已經燒著咗，啲湯燒到乾晒，入面啲湯渣都變晒炭喇，燒咗兩個半鐘。如果我唔係突然醒一醒要去廁所，我諗我又會燒咗個廚房。」Mary姐說事後回想，怎也記不起自己有開過火爐，完全無印象，更說笑般懷疑自己開始有老人痴呆。

【細個遇溺　大個有陰影】

Mary姐除了忌火，同樣也忌水，因為她小時候試過遇溺導致心理陰影很大，就算找教練教游水，上堂前一晚更會擔心得失眠，而且面青青地去上堂，就算勉強下了深不過膊的泳池，她也會像遇溺一樣手腳一直亂揮不停亂抓，連教練也勸她不如別學了。Mary姐那麼怕水，難怪《逆緣》中貪玩如翁芷蘭，且一直與翁芷蕎（夏文汐飾）、庄司晨出雙入對的她，遊船河出海玩樂一幕會沒她的份。

「我可以上遊艇，但我唔可以落水，我試過以前拍一場自殺戲，個導演叫我浸落浴缸，我點都唔得，我就算沖涼用花灑洗頭都唔可以俾啲水由頭淋到落塊面，我真係唔得架，有水浸過頭浸過面我就好似抖唔到氣，所以一定要個身向後彎咁樣洗頭。」看見Mary姐表情好像越說越怕，似乎真的有水在浸她一般。

【而韓馬利不知誰是混血美女】

順帶一提，Mary姐原來只知道「如果太多韓馬利，朱茵一定無定企」這一惡搞廣告歌，而未知自己在網上討論區中大受歡迎並另有「混血美女」這花名。對此，Mary姐大惑不解為何自己是「混血美女」，於是向她解釋：「曾經有網民問韓馬利係咪身材勁正嘅混血美女，令人聽到一頭霧水，後來先發現該網友把韓君婷與韓馬利撈亂，於是人人都開始以『混血美女』稱呼Mary姐。」Mary姐聽後嚇一跳，然後得啖笑地說：「咁抬舉我？呢個名幾好吖，哈哈。」她還開始對網上討論區產生興趣，想看看網友如何愛戴自己添。

【逆緣】糖妹甲組腳唔見咗　分享跑步瘦腳心得：唔食早餐空肚跑步

【逆緣】賀和平仲未衰得透徹　姜大衛：佢貪小便宜啫，本性唔係壞

【逆緣】陳山聰辣手摧殘糖妹　賈綽真心愛Macy：為批金衝昏頭腦