譚仔史上第一個生日PARTY Cheronna為男友黃奕晨安排驚喜

撰文:冼燕珊
出版:更新:

成日有人講笑話想喺譚仔開生日Party,日前終於有人實現呢個夢想喇,第一個成功喺譚仔開生日P 嘅人係夏雨個仔黃奕晨(Dixon),今次仲係女朋友Cheronna(吳嘉熙)嘅驚喜安排,令佢非常Surprised!

夏雨仔仔黃奕晨成為史上第一個喺譚仔搞生日Party 嘅人。(IG圖片)

今次可以話係史上第一次有人咁 Official 地在譚仔開生日Party,Dixon 在IG 留言說:「我諗各式各樣既生日party大家都有見識過,不過一個係譚仔搞既生日party我肯定你地冇去過!點解我咁肯定呢,因為PR姐姐話我係第一個都係最後一個會係譚仔搞生日party既人。」

之前 Cheronna 生日, Dixon整咗個麥樂雞蛋糕,令女友非常驚喜。(IG圖片)
呢個土匪雞翼蛋糕真係不得了。(IG圖片)

Cheronna 接受《香港01》訪問時說:「我同Dixon 都好鐘意食譚仔,所以我諗,如果可以喺一間我哋都鐘意嘅餐廳度過生日都幾開心吖,而且從來無人試過喺譚仔開過party,公司幫我去同譚仔傾,我仲同公司講一定一定一定要搞到。」Cheronna 今次為咗畀驚喜Dixon,所以一路呃住 Dixon 去進行呢件事,佢坦言話非常痛苦:「我係唔識講大話㗎,我好驚好驚好驚穿煲,我試過發夢發到個驚喜穿煲,我嚇醒咗。」

Cheronna 話今次瞞住男友安排驚喜,非常大壓力,仲因此而發惡夢驚醒。(IG圖片)

Dixon 接受《香港01》訪問,大讚女朋友今次整個安排非常「出色」,動用埋公司資源幫佢搞呢個party,唔只委託經理人聯絡譚仔去傾,仲邀請埋 Dixon 最 close 嘅朋友,最不得了係嗰張長輩圖生日Poster 同埋土匪雞翼「蛋糕」,令Dixon非常驚喜,佢話覺得女朋友真係好sweet:「好耐無試過有呢種感覺,直至依家睇返啲相仲會笑出嚟,真係好開心咁笑出嚟」 Dixon 同 Cheronna 感情一向非常甜蜜穩定,佢直言經歷過呢次驚喜,令佢覺得同Cheronna 嘅感情更加昇華,「好耐無試過有一個人花咁多心機同時間,準備一個 Surprise 畀我,我覺得我哋感情再進步咗。」

Cheronna 邀請咗 Dixon 最 close 嘅朋友一齊慶祝生日,令男友非常感動。(IG圖片)
呢張長輩荷花圖真係好有心思。(IG圖片)