【深宮計】網民讚奸得透有望封后 胡定欣:同陳煒戲內鬥到戲外?

撰文:賴家杰
出版:更新:

《宮心計2深宮計》昨日(8日)播出大結局,胡定欣作為女主角晚上當然有出席迎接大結局呢一集嘅活動,定欣對終於播出結局呢一集十分唔捨得:「每一日播出,大家都會有討論,好入戲,有講大家之間嘅角色,好多反應,但完結後就大家就會冇咗呢種感覺,但真係好感謝所有觀眾嘅支持,內地點擊率又好,香港收視又好理想,實在太開心。」
 

胡定欣出席《宮心計2深宮計》大結局活動。(梁碧玲攝)

《宮心計2深宮計》年中就播放完畢,離年尾台慶頒獎典禮日子都仲有一段距離,但定欣今次一角令到網民覺得佢足以再度奪得視后,但另一個對手陳煒亦備受大家留意,佢同定欣劇中嘅大鬥法會唔會變到年尾頒獎典禮再鬥呢?又唔知定欣自己點睇呢?定欣覺得:「睇完我哋嘅戲支持角色係開心事,宜家即係我同煒哥戲內鬥法擺到電視台?咁好開心喎。我今年只得呢一部劇播出,今次飾演呢一個角色好特別,拍嘅過程大家都好辛苦,我都好支持煒哥,我都希望觀眾會支煒哥到最後。」但呢一套劇實在太早播出,又唔係放喺台慶劇時間,會唔令到大家到時候冇咗熱討熱潮?定欣表示唔會想太多:「收視好,口碑好,無論咩討論,觀眾有討論我哋就好開心。」

定欣表示對視后獎項冇期望。(梁碧玲攝)

而定欣同馬浚偉忙完《宮心計2深宮計》宣傳,又同時忙於舞台劇演出,二人日對夜對會唔會因此日久生情,有發展機會呢?定欣笑說:「我哋忙緊發展好多嘅事,我哋會去到多倫多,美國等。」定欣對於有冇發展可能已經唔識回答,所以交畀馬仔,不過馬仔指要睇結局亦選擇不回答了。

定欣力撐煒哥能得視后獎項。(梁碧玲攝)