【限外令】國家廣電總局出新規 要主持內地節目先要夠愛國 

撰文:鄺鈺瑩
出版:更新:
有傳周杰倫以高於《中國新歌聲》一季1億2000萬台幣的酬勞,同林書豪一齊主持內地真人騷《這!就是灌籃》,如果「限外令」落實,收入即時受到影響。

繼「限韓令」、「限娛令」同「限娘令」之後,可能好快就多條「限外令」,因為國家廣電總局日前發布《境外視聽節目引進、傳播管理規定(徵求意見稿)》及《境外人員參加廣播電視節目製作管理規定(徵求意見稿)》,簡單來講,就係電視台機構唔可以聘用境外人員做節目主持,而呢個所謂的「境外人員」原來包香港、澳門及台灣三地。

成件事同淘寶全國包郵但唔包香港一樣!

嗱,要用境外人員唔係唔得,但都符合六大條件,包括「尊重和維護中華人民共和國國家統一、主權和領土完整,尊重和維護中華人民共和國國家尊嚴、榮譽和利益」及「具有良好的公眾形象和健康向上的精神風貌」等,即係要夠愛國先可以參與。近年有唔少香港、台灣藝人都北上發展,薪酬屢創新高,如果廣電總局呢條規例真係通過的話,相當巨量藝人收入受到影響。
 

王祖藍原來一直係以固定嘉賓身份主持《奔跑吧》。

已經主持國內綜藝節目《奔跑吧》六季嘅王祖藍,對於廣電總呢個「限外令」,喺接受電話訪問時就有以下回應:「以我的了解,呢個係徵求意見稿,係放寬咗香港、台灣以及澳門三地人才喺內地擔任主創人員,咁樣反而係好事,令各地精英有更多合作機會。至於主持方面嘅限制,其實內地主持係要考證,我嘅普通話仲要繼續努力!之前我都係以固定嘉賓嘅身分參與節目拍攝。」