【詹朗林專訪‧上】金融才俊做老闆兼任娛樂主持 活出三個人生

撰文:冼燕珊
出版:更新:

《哈利波特》中的妙麗在讀三年級時,從麥教授手上得到一個漏斗型的時光器,令時間回溯,讓妙麗可以比別人有更多時間去讀多些科目。現實中有一個人,他同時兼任三份全職工作,一份是娛樂節目主持,同時在香港任職金融理財總監,幾年前在國內開設金融公司做老闆,他沒有妙麗的時光器,但也能將一個星期7天活成11天。
攝影:梁碧玲

詹朗林沒有時光器,但他盡用時間,活出三個人生。

三軌並行 活出三個人生 

訪問當天,詹朗林穿著一件黑底刺繡T-shirt,上面繡著三朵顏色鮮艷的朱槿花,胸口有一條藍身紅鰭金尾的錦鯉,揀衫如人,他的人生未必華麗,但絕對精彩,因為他能同時活出三個人生。詹朗林既是「金融才俊」,為生意中港兩邊走,亦是ViuTV藝人,現在有份參與《Good Night Show廣告女皇》,同時做三份「全職工作」。

如何可以在有限的時間內做到三軌並行?他說:「我會將每日行程Mark清楚落日程表,好少會有即興活動,如果我見到個時間表係『吉』(空)嘅,我會冇咩安全感,就算係要休息,我都會Mark清楚我嗰幾個鐘係用嚟休息嘅,我唔會用腦記鎖碎嘢,我會寫『To-Do-List』,會跟重要性排列。」他說在拍攝節目期間等候的時間,電腦和手提電話跟身,處理「非娛樂」的工作。

詹朗林說:「自細我有一樣嘢特別強的,就是時間管理。」他的長處讓他可以好好地分配三份全職的工作時間。

超強時間管理 落實「無窿」人生

這樣的人生,依靠的是自律和超強的時間管理,詹朗林的日程表不能「有窿」,他喜歡見縫插針,將時間表排得滿滿的,舉例當日拍攝時間是早上10時,他清晨6時起床,出門健身90分鐘,9點前回到家換衫化妝,10時準時到達拍攝場地。如果是需要處理金融方面的工作,他就會這樣安排:「朝早8點返到公司,做到11點,之後開lunch meeting,一邊食一邊開會,開到1點半,再開另一個會開到3點半,休息15分鐘飲杯咖啡,然後處理行政工作到4點半,5點剪頭髮,之後約朋友食飯,食完飯8點,返到屋企8點半度,換件衫出去游水45分鐘,9點45分游完,返到屋企10點15分,沖完涼仲可以食少少宵夜,睇多套電影,1點鐘瞓覺。」一般人覺得無法做到的,他已實行多年。

記者和攝影師聞言,笑說:「你一日做咗我成個星期嘢。」即使每日要面對繁重的工作,詹朗林依然堅持每個星期有4天健身,不放棄社交及與家人見面的時間。一星期7天都在工作,每天轉換身份,他坦言有時也會出現時差,「我有時朝早瞓醒,要回一回神,諗下我今日係咩角色,有時我真係會一時之間醒唔起,我今日係要著西裝,定係要著拍戲嘅衫。」

即使是「休息」,詹朗林也要Mark 落行程表,否則秘書會為他安排工作。
有時候早上醒來,詹朗林要定一定神,才記得自己今天是哪個「身份」。

以踢波喻人生:落場就要盡力

「我做任何事都好盡力。」詹朗林喝一口冰奶茶,用一個堅定的眼神說:「無論做咩都係一場遊戲,搵錢係重要,但唔係人生最大嘅目標。」他用踢波才比喻人生:「落得場當然係想入球或者想贏,但如果落到場唔認真踢,不如唔好踢啦,我由細到大都有呢個信念。」

詹朗林認為人生是一場遊戲,落得場就要盡力。

因為母親一句說話 曾放棄追夢

詹朗林其實曾經放棄過一次加入娛樂圈的機會,「我讀大學之前,已經有香港嘅電影公司簽咗我,當時我媽並無反對,佢話『唔緊要啦,你鐘意啦,你讀完書你鐘意做乜都得,阿媽唔使你養,你唔想有家庭負擔,屋企都唔使你負擔』。」母親的無條件支持,反而令詹朗心生有愧,「我知道佢係真心的,但呢番說話好重,我覺得照顧屋企係我嘅責任。」他遂放棄了入娛樂圈的機會,大學選修政治及經濟,碩士讀金融分析。「你問我鐘唔鐘意做娛樂,其實我好細個就鐘意做娛樂,但在興趣同家人之間抉擇,我選擇咗家人,永遠都係屋企人係first priority(最首要)。」

詹朗林於2004年從英國學成回港,一直從事金融行業,也許天生注定他要吃行飯,2012年,在機緣巧合下,再一次有一個加入娛樂圈的機會,出現在他眼前,但這次他選擇捉緊。有了多年的工作經驗,他沒有輕率作出決定,之前已經放棄過一次機會,選擇升學做金融,他自問其實是否有第三條路可以行呢?雖然這個選擇最辛苦,要比別人付出多一倍或兩倍的努力,但可以兩者兼得。「人哋過緊一個人生,我同時間過緊三個人生。」

有無後悔不早點入娛樂圈?「絕對無後悔。」詹朗林說:「如果當時我選擇唔行嗰條路,咁佢就唔係一個最佳嘅選擇,我覺得呢個世界好公平,無得後悔,個天一定會安排最好嘅時間讓你遇上最好嘅人,同最好嘅事。依家經歷緊嘅所有事無論好定壞,都一定係最好的。」

每件事都有它發生的理由,詹朗林說:「依家經歷緊嘅所有事無論好定壞,都一定係最好的。」

他這樣形容自己:「我係一個幾任性嘅人,其實我可以好單一咁淨係做金融,但我成日覺得人只係得一世,如果你有有咁嘅機會,點解你有時間剩,你唔任性啲去做你鐘意做嘅嘢呢?依家再次有咁嘅機會畀我,唔通我話唔做,到我40歲先嚟恨做咩。」

詹朗林的確很任性,但任性也要講條件。

原本是一個安分的金融從業員,為什麼會神推鬼㧬地加入了娛樂圈?詹朗林在2011年遭逢劇變,也許是命運一步一步地再次將他推入這行。留意下集:

【詹朗林專訪‧下】人生遭逢劇變被摯友出賣  放緩事業做義工巧遇伯樂

+4

詹朗林轉數快,經常被選中擔任司儀:

場地提供:囍囍冰室

【BB來了‧專訪】戲裡戲外不一樣的盧宛茵:女人一定要有自己事業

【BB來了‧專訪】姚嘉妮長洲妹唔恨入豪門 嫁林祖輝只因一個原因