【殺手】陳豪拍打戲周身傷 陳茵微幫手擦藥油

撰文:吳子生
出版:更新:

陳豪昨晚(11/10)現身中環舉行的周刊30年派對活動。陳豪近日忙於拍攝無綫新劇《殺手》同黎耀祥打到飛起,打到周身瘀晒,仲要勞煩老婆大人陳茵媺幫手捽藥油。「我喺劇集裡面係一個狙擊手,專用槍去殺人,少不免會有拳腳對打,我哋為咗今次拍攝,喺三個月前特別安排武術訓練,所以好多場口我都會親揚身上陣,導演、武指都話最好我哋自己做番,指出嚟更加有神韻喺度,我同祥仔拍打戲打到飛起,打到周身傷,又要瞓地又撞牆,撞到周身傷,手手腳腳條腰都傷晒,太太知我拍戲整親,太太好錫我,佢都會幫我擦藥油。」

陳豪拍打戲周身傷,勞煩太太陳茵微擦藥油。(葉志明攝)

此外,陳豪在戲中與李佳芯有感情綫,當中少不免有親熱戲,原來拍親熱場口,陳豪必定要向老婆申報。「在戲裡面,我同佳芯感情先係助手再成為情侶,之後仲會離離合合,當中都會有好親密嘅鏡頭,所以拍之前都會同老婆講聲,不過佢依家都好少睇電視,喺屋企都唔會點開電視睇,除非有我啲戲佢就會睇吓咁囉。」

陳豪拍親熱戲要向老婆大人申報。(葉志明攝)