蘇施黃原來同黃心穎好老友 搞生日宴仲送埋蛋糕慶生?

撰文:洪曉璇
出版:更新:

全世界有幾十億人口,人有相似真係唔出奇,不過藝人撞樣機會率好似特別高,張敬軒之前搵到各行各業「失散兄弟」,阮兆祥同盧覓雪拍戲扮孖妹真係好難分得清,仲有林海峰同Rubber Band泥鯭,當然唔少得一入行已經被指同蔡一智撞樣嘅黃心穎啦!

黃心穎同蔡一智一向被笑稱係失散兄妹。(蔡一智微博)

蘇施黃呢日喺微博上載多張照片,原來佢約埋一大班好朋友上佢屋企聚餐,有黃子華、古巨基夫婦、金燕玲等,見到佢地滿檯美食加上好多酒杯,睇嚟相當盡興。佢哋仲順便為3位一月壽星慶祝生日,不過其中一個蛋糕就引起網友注意。「Happy Birthday黃心穎」,心穎係就係1月生日,之前仲開校服Party慶祝29+1添,不過乜佢同古巨基甚至子華神咁Friend㗎咩?睇真啲,呢個明明係蔡一智嚟噃!

黃心穎30歲生日開校服派對 馬國明超齡學生Look男主人身份現身

蘇施黃呢日喺家中宴客,順道幫一月壽星們慶生。(蘇施黃微博)
阿智拎住呢個寫上「Happy Birthday黃心穎」嘅生日蛋糕,笑得好開心喎﹗(蘇施黃微博)

其實黃心穎自港姐入行後,已經被指同蔡一智係失散兄妹,有網友更將二人照片拍埋一齊寫住「妝前妝後」。2016年呢對兄妹仲被廣告商相中,齊齊黑白配、髮型七三分界兼一齊撥頭髮,驟眼睇真係連馬國明都未必分得出呀﹗原來兩個人都係一月壽星,蔡一智3號生日而黃心穎就係23號生日,唔知呢對兄妹又會唔會考慮以後一齊慶祝呢?

2016年佢地孖住拍洗頭水廣告,呢下撥頭髮真係非常經典。(蔡一智微博)
+3