麥明詩炒車受傷後繼續跨國單車之旅 緋聞男友胡健燊加入同甘共苦

撰文:洪曉璇
出版:更新:

今日已經係年三十團年夜,當人人忙住辦年貨同執屋迎豬年時,麥明詩(Louisa)今年逃過被親友追問幾時拍拖結婚生仔嘅命運,但唔好太羨慕,因為佢日日食緊風沙,為慈善進行單車長征,由中國出發踩到去柬埔寨。早前佢意外炒車拉傷大腿被逼停踩7日養傷,好在已經康復歸隊,呢日仲喺IG報喜終於去到柬埔寨啦﹗

Louisa、潘梓鋒及隊友們喺年三十已經進入旅程第20日啦﹗(麥明詩IG)
之前麥明詩炒車拉傷大腿,被逼停踩休養,好在無大礙。(麥明詩IG)

Louisa同《東張西望》大隻主持潘梓鋒以及兩位隊友,一同接受跨國踩單車挑戰,途經中國、越南、老撾、泰國及柬埔寨五個國家嘅跨國單車之旅,為期28日一共踩2500公里﹗Louisa 喺1月20號單車之旅第9日已經意外拉傷,到30號先再次上單車繼續旅程,而緋聞男友兼教練胡健燊仲專誠飛到當地,陪佢地一齊繼續旅程,實在相當窩心。重新歸隊踏上旅程,估唔到Louisa就要面臨重大挑戰,Day 18先要踩17公里長上斜,攀七百幾米高山路:「我地喺最後一絲陽光消失之前,到達到目的地。Team hug嘅時候我都忍唔住感動流淚,或者係辛苦得濟喇!」

Louisa 緋聞男友兼教練胡健燊仲專誠飛到當地,陪佢地一齊繼續旅程,實在相當窩心。(麥明詩IG)

麥明詩玩命式踩單車去柬埔寨 戰友潘梓鋒超佩服:要佢照顧我

佢地幾位一齊上山下海歷盡艱辛,呢份革命情感真係難能可貴。(麥明詩IG)

以為苦盡甘來點知Day 19更慘烈,中午高達34度高溫下令全隊人都相當辛苦:「突然間覺得頭疼,有啲暈,想嘔。好彩教練喺側邊,等我可以即刻停低,佢同Bryan即刻倒水落我到幫我降溫。」踩足19日,Louisa坦言原來太陽先係佢地最大敵人:「之前就算幾多山路、路程幾遠,我地都冇諗過放棄,今次我係第一次聽到有隊友想放棄,因為真係頂唔住個熱力。呢個時候,教練由餐廳攞住一大袋冰出黎,幫我地每人整咗個冰袋放喺背脊到。哇真係好work,體溫一降,feel到有啲體力番咗黎。」相信經過呢段旅程後,以後應該無嘢再難到佢地架啦,加油﹗

+10