23歲丁子朗眼白發黃  肝酵素飆升:醫生話十年後有機變肝癌

撰文:吳子生
出版:更新:

丁子朗今日(13/7)現身電視城出席明珠台系列節目《絕色星期二:野性超感官》宣傳造勢活動。丁子朗被問到同女友林宣妤分隔異地,被指留唔住女方。今年23歲的丁子朗直言因為疫情關係分隔異地,但又隨即改口話:「咁我哋本身都係好朋友嚟嘅,咁佢又返咗去馬拉,咁啱又遇到呢啲情況,都真係有辦法嘅。(女方約滿無綫時,你有冇畀意見叫佢留低?)作為朋友都有講一兩句嘅,但我又真係唔敢講咁多,因為始終自己年資又唔係好深,唔想影響到佢嘅事業,無論點我都好尊重佢嘅決定。」

丁子朗眼白發黃,原來肝臟出現問題。(陳順禎攝)

子朗受訪期間,表現疲倦眼白發黃,細問之下,丁子朗坦言肝臟出現問題,經醫生診斷後,證實肝酵素飆升,「其實呢個情況都有半年時間,自己又唔煙唔酒,我都唔知點解會咁,醫生話十年之後,有機會變成肝癌,醫生叫我多啲休息,但呢排又要拍《七公主》,都冇乜時間休息,不過我而家搵緊中醫睇,睇下有乜方法,可以改善到個體質。(屋企人知唔知?)佢都好似知道,我都唔記得有冇講俾佢哋知。(你眼白好黃!)我都知,拍劇嘅時侯,劇組啲人都有同我講,話我眼白好黃,問我係咪身體有事,講真其實自己都有啲擔心。」

丁子朗透露肝臟出現問題,經已有半年時間。(陳順禎攝)