【致命復活.劇透】郭晉安被人陷害 萬綺雯係惡毒人妻?

撰文:郭敏玲
出版:更新:
郭晉安在劇中的角色真係幾灰,十年後人面全非,老婆又愛上別人,人海茫茫難以找到兇手,好慘!

上回講到《致命復活》見到萬綺雯個野人look,為整套劇留下了懸念。另一邊廂,郭晉安被困山洞10年後逃出生天,即將上演一場尋兇記。就現時劇情而言,大家猜測的套路似是老婆萬綺雯為呃保險金,自編自導自演一場綁架案,「係咁意」去越南搵老公下落,從而增加真實感。然後意料不到老公求生意志如此強勁,慢慢處心積慮,逐漸展現真面目......不過,咁樣諗似乎諗太多,件事其實好簡單。

郭晉安奇蹟生還後,返到香港見老婆萬綺雯,奈何消失太耐,法定上已被判為死亡,隨之而來的夫妻關係,亦因此終結,聽落真係幾灰。你等人,人家未必等你,十年又過去,萬綺雯與黃德斌互生情愫,郭晉安親眼望見,心都碎埋。男人角度就梗係發咗脾氣先,之但係郭晉安後來知道萬綺雯為搵自己搵到成身債,一句怨言都無,怪就怪自己命水唔好啦......十年唔見人,搵第二個男人陪下都好正常。所以呢,萬綺雯作為一個女人,要自己撐足十年係唔容易,還有閒情日致整死郭晉安?大家誤會了,萬綺雯100%係好人,絕對冇陷害老公,但黃德斌又係咪好人?記得留意啦!

但睇落去,就會發覺萬綺雯真係一個有情有義的人。
老公失蹤十年,萬綺雯眼見黃德斌對自己咁好,產生情愫。