《萬千星輝頒獎典禮2025》今晚（1月4日）於澳門舉行。金剛、林曉峰（阿Lo）和王祖藍任頒獎嘉賓。講到金剛，早前他就因被傳是小儀的神秘老公而成為熱話。

金剛接受訪問時，傳媒首先開口「祝福」他新婚快樂，他回答：「恭喜小儀，係咪呀？我都估唔到點解係小儀呢？（竟然係你）我自己都好意外。」林曉峰：「點解好意外？因為俾人爆咁出嚟？」金剛：「唔係⋯⋯哈哈，好意外意思係，我真係估唔到，一早⋯⋯」林曉峰：「一早拒絕咗小儀？」金剛：「小儀話我哋係人鬼殊途，冇可能。（怎係否認愈似係）係係係，我係同小儀結婚，咁點呀？」

金剛又表示，為小儀結婚而真心感到高興。「真係好恭喜佢，好難得佢可以搵到真愛。我都覺得佢老公好偉大，幫大家解決一件事。（解決咗咩？）解決咗一個咁好嘅人。」「女神」結婚有沒有心碎？金剛又回答：「我女神係邊個？」林曉峰開玩笑：「睇你個樣心緒不寧咁樣，人哋問你都唔知點解。好明顯心都碎晒啦。」記者表示，金剛的「女神」即是小儀，他又回答：「不可能啦！」訪問中，金剛透露，其實他認識小儀的老公，坦言是一個好人。