鄭嘉穎日前出席活動，指將兒子由國際學校幼稚園，轉讀傳統學校直言在升學上「我哋行錯一步」，大人細路都感後悔，更指個仔做功課做到喊，唯有同個仔講︰「你老豆以前都好憎默書，但係有個方法，就係將憎嘅嘢快快趣趣做晒佢，咁你咪可以玩，做自己鍾意嘅嘢囉。」事件惹起網上關注。

今日（30/1）郭羨妮現身銅鑼灣出席活動，就事件接受《香港01》訪問時表示：「其實我個女本身係讀傳統學校，因為當時我想佢行我條路，佢就入咗我間小學，但係佢讀得好辛苦，因為好嚴，同好多功課好大壓力，你試諗下細細個六七歲小朋友，就已經有成10樣功課，咁我都覺得好誇張，同埋當其時我又會要佢去補習，又咁多功課做，佢係好慘。」

郭羨妮續說：「佢自己都頂唔順，跟住佢好唔開心成日喊，所以最後同佢轉咗讀國際學校，而家佢好開心，一路都好開心。記得當時阿女小一小二嘅中文，已經係好犀利，一篇篇好長嗰啲文章，個 Level高嘅，到佢過去國際學校嗰邊呢，就唔同晒，佢係讀簡體字，同埋講國語。自從幫佢轉咗國際學校之後，佢真係開心咗好多。」