林盛斌（Bob）育有三女一子，其中18歲大女林霏兒（Faye）轉眼間已經亭亭玉立，近年更因打扮性感而頻頻成為外界焦點。Faye早前透露將入讀香港演藝學院的「基礎戲劇文憑」（Diploma in Drama Foundations）課程，積極為未來幕前發展鋪路。近期她更努力經營KOL事業，幾乎每日出Post吸粉。昨日（21日）她在IG Story分享與友人旅行的片段，更首度大晒惹火比堅尼照，展現自信美！

沖繩畢業遊　躺沙灘晒桃紅比堅尼

Faye在IG Story分享了與好友出國旅行的片段，並寫道「grad trip Okinawa」。從畫面可見，Faye與友人的沖繩行程相當豐富，除了去水族館睇魚、歎日式燒肉外，當然少不了享受當地的陽光與海灘。Faye與好友一齊去沙灘兼玩潛水，她更破格首度派福利，大晒性感泳衣自拍照！相中見她穿上桃紅色比堅尼躺在沙灘上，休閒地閉起雙眼自拍，雖然身形偏胖，但勝在有明顯腰線，加上驕人上圍，展現出豐滿惹火的曲線，十分吸睛。

拍片教建自信：「三個字，讚多啲」

Faye一直無懼部分網民對其身形的負評，早前更憑自信態度接下品牌廣告。她在另一段影片中，就親自教網民如何建立自信。她說：「今日我哋要講吓，點樣練習自信。三個字，讚多啲。」

她舉例表示可以主動稱讚別人：「例如係：『Hi girl，我覺得你條裙好啱你呀！』我自己出街嘅時候，當我見到一啲美好嘅事物或者人嘅時候，我就會忍唔住好想同佢哋講，而我真係會講，就係讚佢哋。」Faye認為，簡單一小句讚美，已經可以改變對方全日的心情。

懶理網民負評：自己唔好咁做就得

除了讚美別人，Faye亦強調要懂得欣賞自己：「另外，就係多啲讚自己。呢一世人裡面，一直一直都會有好多人喺你身邊，最後都係得返你自己㗎咋。」她續指自己並非盲目自信：「我唔會話呢個係洗腦自己啦，純粹係欣賞自己嘅發光點啫，同時間都要欣賞吓其他人嘅發光點。」

面對網上不時出現的人身攻擊，Faye展現出極高情商，她在片末霸氣表示：「其實明明呢個世界上面有好多人，都可以揀去欣賞人哋，而唔係去評論人哋。好多人都會揀去評論人哋，由佢哋，自己唔好咁做就得啦。」